దేవీమహాత్మ్యమ్ !

దుర్గాసప్తశతి !!

చణ్డముణ్ద వథో నామ సప్తమాధ్యాయః ||


||om tat sat||

ఉత్తర చరితము
మహాసరస్వతీ ధ్యానమ్

ఘణ్టాశూలహలాని శంఖముసలే చక్రం ధనుః సాయకం
హస్తాబ్జైర్దధతీం ఘనాన్తవిలసచ్చీతాంశు తుల్యప్రభామ్|
గౌరీదేహసముద్భవాం త్రిజగతామాధారభూతాం మహా
పూర్వామత్ర సరస్వతీమనుభజే శుమ్భాది దైత్యార్దినీమ్||

||ఓమ్ తత్ సత్||
=============
సప్తమాధ్యాయః

ఆజ్ఞపాస్తే తతో దైత్యాశ్చణ్డముణ్దపురోగమాః|
చతురంగబలో పేతా యుయురభ్యుద్యతాయుధాః||1||

దదృశుస్తే తతో దేవీమీషద్ధాసాం వ్యవస్థితామ్|
సింహస్యోపరి శైలేన్ద్రసృంగే మహతి కాంచనే||2||

తే దృష్ట్వా తాం సమాదాతుం ఉద్యమంచక్రురుద్యతః|
అకృష్టచాపాసిధరాస్తథాsన్యే తత్సమీపగా||3||

తతః కోపం చకారోచ్చైరమ్బికా తానరీన్ప్రతి|
కోపేన చాస్యా వదనం మషీవర్ణమభూత్ తదా||4||

భ్రుకుటీకుటిలాత్త్సా లలాటఫలకాద్ద్రుతమ్|
కాళీ కరాళ వదనా వినిష్క్రాన్తాసిపాశినీ||5||

విచిత్ర ఖట్వాంగధరా నరమాలావిభూషణా|
ద్వీపిచర్మపరీధానా శుష్కమాంశాతి భైరవా||6||

అతి విస్తార వదనా జిహ్వాలలనభీషణా|
నిమగ్నారక్తనయనా నాదాపూరితదింగ్ముఖా||7||

సా వేగేనాభిపతితా ఘాతయన్తీ మహాసురాన్|
సైన్యే తత్ర సురారీణా మభక్షయత తద్బలమ్||8||

పార్ష్ణిగ్రాహాం కుశగ్రాహియోధఘణ్టాసమన్వితాన్|
సమాదాయైకహస్తేన ముఖే చిక్షేప వారణాన్||9||

తథైవ యోధం తురగై రథం సారథినా సహ|
నిక్షిప్య వక్త్రే దశనైశ్చర్వయత్యతిభైరవమ్||10||

ఏకం జగ్రాహ కేశేషు గ్రీవాయామథ చాపరమ్|
పాదేనాక్రమ్య చైవాన్యమురసాన్యమపోథయత్||11||

తైర్ముక్తాని చ శస్త్రాణి మహాస్త్రాణి తథాసురైః|
ముఖేనజగ్రాహ రుషా దశనైర్మథితాన్యపి ||12||

బలినాం తద్బలం సర్వం అసురాణాం దురాత్మనామ్|
మమర్దాభక్షయచ్చాన్యాన్ అన్యాంశ్చాతాడయత్తథా||13||

అసినా నిహతాః కేచిత్ కేచిత్ ఖత్వాంగతాడితాః|
జగ్ముర్వినాశమసురా దన్తాగ్రాభిహతాస్తథా||14||

క్షనేన తద్బలం సర్వం అసురాణాం నిపాతితమ్|
దృష్ట్వా చణ్డోsభిదుద్రావ తాం కాళీమతిభీషనామ్||15||

శరవర్షైర్మహాభీమైర్భీమాక్షీం తాం మహాసురః|
ఛాదయామాస చక్రైశ్చ ముణ్దః క్షిప్తైః సహస్రశః||16||

తాని చక్రాణ్యనేకాని విశమానాని తన్ముఖమ్|
బభుర్యథార్కబిమ్బాని సుబహూని ఘనోదరమ్||17||

తతోజహాసతిరుషా భీమం భైరవనాదినీ|
కాళీ కరాళవక్త్రాన్తర్దుర్దర్శదసనోజ్జ్వలా||18||

ఉత్థాయ చ మహాసింహం దేవీ చణ్దమధావత|
గృహీత్వా చాస్య కేశేషు శిరస్తేనాచ్ఛినత్ ||19||

అథ ముణ్డోsభ్యధావత్తాం దృష్ట్వా చణ్డం నిపాతితం |
తమప్యపాతయద్భూమౌ సా ఖడ్గాభిహతం రుషా||20||

హతశేషం తతః సైన్యం దృష్ట్వా చణ్డం నిపాతితం|
ముణ్డం చ సు మహావీర్యం దిశో భేజే భయాతురమ్||21||

శిరశ్చణ్డస్య కాళీ చ గృహీత్వా ముణ్డమేవచ|
ప్రాహ ప్రచణ్డాట్టహాసమిశ్రమభ్యేత్య చణ్డికామ్||22||

మయా తవాత్రోపహృతౌ చణ్డముణ్డౌ మహాపశూ|
యుద్ధయజ్ఞే స్వయం శుమ్భం నిశుమ్భం చ హనిష్యసి||23||

ఋషిరువాచ||

తవానీతౌ తతో ద్రూష్ట్వా చణ్దముణ్దౌ మహాసురౌ|
ఉవాచ కాళీం కల్యాణీ లలితం చణ్డికా వచః||24||

యస్మాచ్చణ్డం చముణ్డం చ గృహీత్వా త్వముపాగతా|
చాముణ్డేతి తతో లోకే ఖ్యాతా దేవి భవిష్యసి||25||

ఇతి మార్కణ్డేయ పురాణే సావర్ణికే మన్వన్తరే
దేవీ మహాత్మ్యే చణ్డముణ్ద వథో నామ
సప్తమాధ్యాయః ||

|| ఓమ్ తత్ సత్||
=====================================