||సుందరకాండ శ్లోకాలు||

|| పారాయణముకోసము||

|| సర్గ 22 ||

 


|| ఓమ్ తత్ సత్||

సుందరకాండ.
అథ ద్వావింశస్సర్గః

సీతాయావచనం శ్రుత్వా పరుషం రాక్షసాధిపః|
ప్రత్యువాచ తత స్సీతాం విప్రియం ప్రియదర్శనామ్|| 1||

యతా యథా సాంత్వయితా వశ్య స్ప్రీణాం తథా తథా|
యథా యథా ప్రియం వక్తా పరిభూత స్తథా తథా||2||

సన్నియమేచ్ఛతి మే క్రోథం త్వయి కామ స్సముత్థితః|
ద్రవతోsమార్గ మాసాద్య హయా నివ సుసారథిః||3||

వామః కామో మనుష్యాణాం యస్మిన్ కిల నిబధ్యతే|
జనే తస్మిన్ స్త్వనుక్రోశ స్నేహశ్చ కిల జాయతే ||4||

ఏతస్మాత్ కారాణాన్ న త్వాం ఘాతయామి వరాననే|
వధార్హాం అవమానార్హాం మిథ్యా ప్రవ్రజితే రతామ్||5||

పరుషాణీహ వాక్యాని యాని యాని బ్రవీషి మామ్|
తేషు తేషు వధోయుక్తః తవ మైథిలి దారుణః||6||

ఏవముక్త్వాతు వైదేహీం రావణో రాక్షసాధిపః|
క్రోధసంరంభ సంయుక్తః సీతాం ఉత్తరమబ్రవీత్||7||

ద్వౌమాసౌ రక్షితవ్యౌ మే యోsవధిస్తే మయా కృతః|
తత శ్శయనమారోహమమత్వం వరవర్ణినీ||8||

ఊర్ధ్వం ద్వాభ్యాం తు మాసాభ్యాం భర్తారం మా మనిచ్ఛతీమ్|
మమ త్వాం ప్రాతరాశార్థం ఆరభంతే మహానసే||9||

తాం తర్జ్యమానాం సంప్రేక్ష్య రాక్షసేంద్రేణ జానకీం|
దేవగంధర్వకన్యాః తవిషేదుర్వికృతేక్షణాః||10||

ఓష్ఠప్రకారైః అపరా వక్త్రనేత్రై స్తథాsపరే |
సీతాం ఆశ్వాసయామాసు స్తర్జితాంతేన రక్షసా||11

తాభిరాశ్వాసితా సీతా రావణమ్ రాక్షసాధిపమ్|
ఉవాచాత్మహితం వాక్యం వృత్త శౌండీర్య గర్వితమ్|| 12||

నూనం నతే జనః కశ్చిత్ అస్తి నిశ్శ్రేయసే స్థితః|
నివారయతి యో న త్వామ్ కర్మణోsస్మాత్ విగర్హితాత్||13||

మా హి ధర్మాత్మనః పత్నీం శచీమివ శచీపతేః|
త్వదన్యః త్రిషు లోకేషు ప్రార్థయే న్మనసాsపి కః||14||

రాక్షసాధమ రామస్య భార్యాం అమిత తేజసః|
ఉక్తవానపి యత్పాపం క్వ గత స్తస్య మోక్ష్యసే||15||

యథా దృప్తశ్చ మాతంగః శశ శ్చ సహితో వనే|
తథా ద్విరదవ ద్రామస్త్వం నీచ శశవత్ స్మృతః||16||

స త్వం ఇక్ష్వాకునాథం వై క్షిపన్నిహన లజ్జసే|
చక్షుషోర్విషయం తస్య న తావ దుపగచ్ఛసి||17||

ఇమే తే నయనే క్రూరే విరూపే కృష్ణపింగళే |
క్షితౌ న పతితే కస్మా న్మామనార్య నిరీక్షితః||18||

తస్య ధర్మాత్మనః పత్నీం స్నుషాం దశరథస్య చ|
కథం వ్యాహరతో మాఅ తేన జిహ్వా వ్యవసీర్యతే||19||

అసందేశాత్తు రామస్య తపసశ్చ అనుపాలనాత్|
న త్వాం కుర్మి దశగ్రీవ భస్మ భస్మార్హ తేజసా||20||

నాపహర్తు మహం శక్యా త్వయా రామస్య ధీమతః|
విధిస్తవ వధార్ధాయ విహితో నాత్ర సంశయః||21||

శూరేణ ధనదభ్రాత్రా బలై స్సముదితేన చ|
అపోహ్యా రామం కస్మాద్ధి దారచౌర్యం త్వయా కృతమ్||22||

సీతాయా వచనం శ్రుత్వా రావనో రాక్షసాధిపః|
వివృత్య నయనే క్రూరే జానకీ మన్వవైక్షత||23||

నీలజీమూత సంకాశో మహాభుజశిరోధరః|
సింహసత్వగతి ః శ్రీమాన్ దీప్తజిహ్వాగ్రలోచనః||24||

చలాగ్రమకుటప్రాంశుః చిత్రమాల్యానులేపనః|
రక్తమాల్యాంబరధర సస్తాంగదవిభూషణః||25||

శ్రోణి సూత్రేణ మహతా మేచకేనసుసంవృతః|
అమృతోత్పాదనద్దేన భుజగేనైవ మందరః||26||

తాభ్యాం పరిపూర్ణాభ్యాం భుజాభ్యాం రాక్షసేశ్వరః|
శుశుభే చలసంకాశః శృంగాభ్యామివ మందరః||27||

తరుణాదిత్యవర్ణాభ్యాం కుండలాభ్యాం విభూషితః|
రక్తపల్లవపుష్పాభ్యాం అశోకాభ్యాం ఇవాచలః||28||

సకల్పవృక్షప్రతిమో వసంత ఇవ మూర్తిమాన్|
శ్మశానచైత్యప్రతిమో భూషితోsపి భయంకరః||29||

అవేక్షమాణో వైదేహీం కోపసంరక్త లోచనః|
ఉవాచ రావణ స్సీతాం భుజంగ ఇవ నిశ్శ్వసన్||30||

అనయేనాభిసంపన్నమ్ అర్థహీనం అనువ్రతే|
నాశయా మ్యహమద్య త్వాం సూర్య స్సంధ్యా మివౌజసా||31||

ఇత్యుక్త్వా మైథిలీం రాజ రావణ శ్శత్రు రావణః|
సమ్దిదేశ తతః సర్వా రాక్షసీ ర్ఘోరదర్శనాః||32||

ఏకాక్షీం ఏకకర్ణాం చ కర్ణప్రావరణం తథా|
గోకర్ణీం హస్తికర్ణీం చ లంబకర్ణీం అకర్ణికామ్||33||

హస్తి పాద్యశ్వపాద్యౌ చ గోపాదీం పాదచూళికమ్|
ఏకాక్ష్ం ఏకపాదీం చ పృథుపాదీం అపాదికామ్||34||

అతిమాత్ర శిరో గ్రీవాం అతిమాత్ర కుచోదరీమ్|
అతిమాత్రస్య నేత్రాం చ దీర్ఘజిహ్వాం అజిహ్వికామ్||35||

అనాశికాం సింహముఖీం గోముఖీం సూకరీముఖీమ్|
యథా మత్ వశగా సీతా క్షిప్రం భవతి జానకీ||36||

తథా కురుత రాక్షస్యః సర్వాం క్షిప్రం సమేత్య చ|
ప్రతిలోమాను లోమైశ్చ సామదానాది భేదనైః||37||

అవర్జయత వైదేహీం దండస్యోద్యమనేనచ|
ఇతి ప్రతిసమాదిశ్య రాక్షసేంద్రః పునః పునః||38||

కామన్యుపరీతాత్మా జానకీం పర్యతర్జయత్|
ఉపగమ్య తతః క్షిప్రం రాక్షసీ ధాన్యమాలినీ||39||

పరిష్వజ్య దశగ్రీవం ఇదం వచనమబ్రవీత్|
మయాక్రీడ మహారాజ సీతయా కిం తవానయా||40||

వివర్ణయా కృపణయా మానుష్యా రాక్షసేశ్వర|
నూనం అస్యా మహారాజ ని దివ్యాన్ భోగసత్తమాన్||41||

విదదధాత్యమరశ్రేష్ఠః తవ బాహుబలార్జితాన్|
అకామం కామయానస్య శరీరముపతప్యతే||42||

ఇచ్ఛంతీం కామయానస్య ప్రీతిర్భవతి శోభనా|
ఏవముక్తస్తు రాక్షస్యా సముత్‍క్షిప్త స్తతో బలీ||43||

ప్రహసన్మేఘ సంకాశో రాక్షస స్సన్యవర్తత|
ప్రస్థిత స్స దశగ్రీవః కంపయన్నివ మేదినీమ్||44||

జ్వలద్భాస్కరవర్ణాభాం ప్రవివేశ నివేశనమ్|
దేవగంధర్వ కన్యాశ్చ నాగకన్యాశ్చ సర్వతః||45||

పరివార్య దశగ్రీవం వివిశు స్తం గృహోత్తమమ్||46||

స మైథిలీం ధర్మపరాం అవస్థితామ్
ప్రవేపమానాం పరిభర్త్స్య రావణః|
విహాయసీతాం మదనేన మోహితః
స్వమేవ వేశ్మ ప్రవివేశ భాస్వరమ్||47||

ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే ద్వావింశస్సర్గః||

 

|| Om tat sat ||