||సుందరకాండ శ్లోకాలు||

|| పారాయణముకోసము||

|| సర్గ 64 ||

 

|| ఓమ్ తత్ సత్||

సుందరకాండ.
అథ చతుష్షష్టితమస్సర్గః||

సుగ్రీవైణేవ ముక్తస్తు హృష్టో దధిముఖః కపిః|
రాఘవం లక్ష్మణం చైవ సుగ్రీవం చాsభ్యవాదయత్||1||

స ప్రణమ్య చ సుగ్రీవం రాఘవౌ చ మహాబలౌ|
వానరైస్సహితైః శూరైర్దివమేవోత్పపాత హ||2||

స యథైవాsగతః పూర్వం తథైవ త్వరితం గతః|
నిపత్య గగనాద్భూమౌ తద్వనం ప్రవివేశ హ||3||

స ప్రవిష్టో మధువనం దదర్శ హరియూథపాన్|
విమదాన్ ఉత్థితాన్ సర్వాన్ మేహమానాన్ మధూదకమ్||4||

స తానుపాగమద్వీరో బద్ద్వా కరపుటాంజలిమ్|
ఉవాచ వచనం శ్ల‍‍క్ష్‍ణ మిదం హృష్టవదంగదమ్||5||

సౌమ్యరోషో న కర్తవ్యో యదేభిరభివారితః|
అజ్ఞానాద్రక్షిభిః క్రోధాత్ భవంతః ప్రతిషేధితాః||6||

యువరాజః త్వమీశశ్చ వనస్యాస్య మహాబలః|
మౌర్ఖాత్ పూర్వం కృతో దోషః తం భవాన్ క్షంతుమర్హతి||7||

అఖ్యాతం హి మయా గత్వా పితృవ్యస్య తవానఘ|
ఇహోపయాతం సర్వేషాం ఏతేషాం వనచారిణామ్||8||

స త్వ దాగమనం శ్రుత్వా సహైభిర్హరియూధపైః|
ప్రహృష్టో నతు రుష్టోsసౌ వనం శ్రుత్వా ప్రధర్షితమ్||9||

ప్రహృష్టో మాం పితృవ్యస్తే సుగ్రీవో వానరేశ్వరః|
శీఘ్రం ప్రేషయ సర్వాంస్తానితి హోవాచ పార్థివః||10||

శ్రుత్వా దధిముఖస్యేదం వచనం శ్ల‌క్ష‍ణమంగదః|
అబ్రవీత్తాన్ హరిశ్రేష్ఠో వాక్యం వాక్య విశారదః||11||

శంకేశ్రుతోsయం వృత్తాంతో రామేణ హరియుథపాః|
తత్ క్షణం నేహ న స్థ్సాతుం కృతే కార్యే పరంతపాః||12||

పీత్వా మధు యథాకామం విశ్రాంతా వనచారిణః|
కిం శేషం గమనం తత్ర సుగ్రీవో యత్ర మే గురుః||13||

సర్వే యథా మాం వక్ష్యంతే సమేత్య హరియూథపాః|
తథాsస్మి కర్తా కర్తవ్యే భవద్భిః పరవానహమ్||14||

నాజ్ఞాపయితు మీశోsహం యువరాజోsస్మి యద్యపి|
అయుక్తం కృతకర్మాణో యూయం ధర్షయితుం మయా||15||

బ్రువతశ్చాంగదస్యైవం శ్రుత్వా వచనమవ్యయమ్|
ప్రహృష్టో మనసో వాక్యమిదమూచుర్వనౌకసః||16||

ఏవం వక్ష్యతి కో రాజన్ ప్రభుః సన్ వానరర్షభ|
ఇశ్వర్యమదమత్తో హి సర్వోsహమితి మన్యతే||17||

తవ చేదం సుసదృశం వాక్యం నాన్యస్య కస్యచిత్|
సన్నతిర్హి తవాఖ్యాతి భవిష్యచ్ఛుభయోగ్యతామ్||18||

సర్వే వయమపి ప్రాప్తాః తత్ర గంతుం కృతక్షణాః|
స యత్ర హరివీరాణాం సుగ్రీవః పతిరవ్యయః||19||

త్వయా హ్యనుక్తైర్హరిభిర్నైవ శక్యం పదాత్పదమ్|
క్వచిత్ గంతుం హరిశ్రేష్ఠ బ్రూమః సత్యమిదం తు తే||20||

ఏవం తు వదతామ్ శేషాం అంగదః ప్రత్యువాచ హ|
బాఢం గచ్చామ ఇత్యుక్తా ఖముత్పేతుర్మహాబలాః||21||

ఉత్పతంతమనూత్పేతుః సర్వే తే హరియూథపాః|
కృత్వాకాశం నిరాకాశం యంత్రోత్ క్షిప్తా ఇవాచలాః||22||

తేంబరం సహసోత్పత్య వేగవంతః ప్లవంగమాః|
నినదంతో మహానాదం ఘనా వాతేరితా యథా||23||

అంగదే సమనుప్రాప్తే సుగ్రీవో వానరాధిపః|
ఉవాచ శోకోపహతం రామం కమలలోచనమ్||24||

సమాశ్వసిహి భద్రం తే దృష్టాదేవీ న సంశయః|
నాగంతు మిహ శక్యం తై రతీతే సమయే హి నః||25||

న మత్సకాశ మాగచ్ఛేత్ కృత్యే హి వినిపాతితే|
యువరాజో మహాబాహుః ప్లవతాం ప్రవరోంగదః||26||

యద్యప్యకృతకృత్యానాం ఈదృశః స్యాదుపక్రమః|
భవేత్ స దీనవదనో భ్రాంత విప్లుతమానసః||27||

పితృపైతామహం చైతత్ పూర్వకైరభిరక్షితమ్|
న మే మధువనం హన్యాదహృష్టః ప్లవగేశ్వరః||28||

కౌసల్యా సుప్రజా రామ సమాశ్వసి హి సువ్రత|
దృష్టా దేవీ న సందేహో న చాన్యేన హనూమతా||29||

న హ్యన్యః కర్మణో హేతుః సాధనేsస్య హనూమతః|
హనూమతి హి సిద్ధిశ్చ మతిశ్చ మతిసత్తమ||30||

వ్యవసాయశ్చ వీర్యం చ సూర్యే తేజ ఇవ ద్రువమ్|
జాంబవాన్యత్ర నేతాస్యాదంగదశ్చ బలేశ్వరః||31||

హనుమాంశ్చాప్యథిష్ఠాతా న తస్య గతిరన్యథా|
మాభూశ్చింతా సమాయుక్తః సంప్రత్యమితవిక్రమః||32||

తతః కిలకిలాశబ్దం శుశ్రావాసన్నమంబరే|
హనుమత్కర్మ దృప్తానాం నర్దతాం కాననౌకసామ్||33||

కిష్కింధాముపయాతానాం సిద్ధిం కథయతా మివ|
తతః శ్రుత్వా నినాదం తం కపీనాం కపిసత్తమః||34||

అయతాంచితలాంగూలః సోsభవద్దృష్టమానసః|
అజగ్ముస్తేsపి హరయో రామదర్శనకాంక్షిణః||35||

అంగదం పురతః కృత్వా హనూమంతం చ వానరమ్|
తే అంగద ప్రముఖావీరాః ప్రహృష్టాశ్చ ముదాన్వితః||36||

నిపేతుర్హరిరాజస్య సమీపే రాఘవస్య చ|
హనుమాంశ్చ మహాబాహుః ప్రణమ్య శిరసా తతః||37||

నియతామక్షతాం దేవీం రాఘవాయ న్యవేదయత్|
నిశ్చితార్థః తతః తస్మిన్ సుగ్రీవః పవనాత్మజే||38||

లక్ష్మణః ప్రీతిమాన్ ప్రీతం బహుమనాదవైక్షత|
ప్రీత్యా రమమాణోsథ రాఘవః పరవీరహ||
బహుమానేన మహతా హనుమంత మవైక్షతా||39||

ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే చతుష్షష్టితమస్సర్గః||


|| ఓమ్ తత్ సత్||


|| Om tat sat ||