||Sundarakanda ||

|| Sarga 17||( Only Slokas in Devanagari) )

हरिः ओम्

सुंदरकांड.
अथ सप्तदशस्सर्गः

ततः कुमुदषंडाबो निर्मलो निर्मलं स्वयं।
प्रजगाम नभश्चंद्रो हंसो नीलमिवोदकम्॥1||

साचिव्य मिव कुर्वन् स प्रभया निर्मलप्रभः
चंद्रमा रश्मिभिः शीतैः सिषेवे पवनात्मजम्॥2||

स ददर्श ततस्सीतां पूर्णचंद्र निभाननाम्।
शोकभारैरिव न्यस्तां भारैर्नाव मिवांभसी॥3||

दिदृक्षमाणो वैदेहीं हनुमान् मारुतात्मजः।
स ददर्शा विदूरस्था राक्षसी र्घोरदर्शनाः॥4||

एकाक्षीं एककर्णां च कर्ण प्रवरणां तथा।
अकर्णां शंकुकर्णां च मस्तकोछ्छ्वासनाशिकाम्॥5||

अतिकायोत्तमांगीं च तनुदीर्घशिरोधरां।
ध्वस्थकेशीं तथाsकेशीम् केशकंबळधारिणीम्॥6||

लंबकर्णललाटं च लंबोदरपयोधराम्।
लंबोष्टीं चुबुकोष्टीं च लंबस्यां लंबजानुकाम्॥7||

ह्रस्वां दीर्घां तथा कुब्जां विकटां वामनां तथा।
कराळां भुग्नवक्त्रां च पिंगाक्षीं विकृताननाम्॥8||

विकृताः पिंगळाः काळीः क्रोधनाः कलहप्रियाः।
कालायस महाशूल कूटमुद्गर धारिणीः॥9||

वराह मृग शार्दूल महिषाज शिवामुखीः।
गजोष्ट्र हयपादीश्च निखातशिरसो पराः॥10||

एकहस्तैकपादाश्च खरकर्ण्यश्वकर्णिकाः।
गोकर्णी हस्तिकर्णीच हरिकर्णी स्तथापरा॥11||

अनासा अतिनासाश्च तिर्यज्ञ्नास विनाशिकाः।
गजसन्निभनासाश्च ललाटोच्छ्वासनासिकाः॥12||

हस्तिपादा महपादा गोपादाः पादचूळिकाः।
अतिमात्र शिरोग्रीवा अतिमात्रकुचोदरी॥13||

अतिमात्रास्यनेत्राश्च दीर्घजिह्वा नखास्तथा।
अजामुखीः हस्तिमुखीः गोमुखीः सूकरीमुखीः॥14||

हयोष्ट्र खरवक्त्राश्च राक्षसीर्घोरदर्शनाः।
शूलमुद्गर हस्ताश्च क्रोधनाः कलहप्रियाः॥15||

कराळा धूम्रकेशीश्च राक्षसीर्विकृताननाः।
पिबंतीस्सततं पानं पदा मांस सुरा प्रियाः॥16||

मांस शोणीतदिग्धांगी र्मासशोणितभोजनाः।
ता ददर्श कपिश्रेष्ठो रोमहर्षणदर्शनाः॥17||

स्कंधवंत मुपासीनाः परिवार्य वनस्पतिम्।
तस्याधस्ताच्च तां देवीं राजपुत्रीं अनिंदिताम्॥18||

लक्षयामास लक्ष्मीवान् हनुमान् जनकात्मजाम्।
निष्प्रभां शोकसंतप्तां मलसंकुलमूर्धजाम्॥19||

क्षीणपुण्यां च्युतां भूमौ तारां निपतितामिव।
चारित्र व्यपदेशाढ्यां भर्तृदर्शनदुर्गताम्॥20||

भूषणैरुत्तमार्हीनां भर्तृवात्सल्यभूषणाम्।
राक्षसाधिपसंरुद्धां बंधुभिश्च विनाकृताम्॥21||

वियूधां सिंहसंरुद्धां बद्धां गजवधूमिव।
चंद्ररेखां पयोदांते शारदभ्रैरिवावृताम्॥22||

क्लिष्टरूपां असंस्पर्शा दयुक्ता मिव पल्लकीम्।
सीतां भर्तृवशे युक्तां अयुक्तां राक्षसी वशे॥23||

अशोककवनिका मध्ये शोकसागरमाप्लुताम्।
ताभिः परिवृतां तत्र सग्रह मिव रोहिणीम्॥24||

ददर्श हनुमान् देवीं लता सुकुसुमामिव।
सा मलेन दिग्धांगी वपुषा चाप्यलंकृता॥25||

मृणाळी पंकदिग्धेन विभाति न विभाति च।
मलिनेनतु वस्त्रेण परिक्लिष्टेन भामिनीम्॥26||

संवृतां मृग शाबाक्षीं ददर्श हनुमान् कपिः।
तां देवीं दीनवदनां अदीनां भर्तृतेजसा॥27||

रक्षितां स्वेन शीलेन सीतां असितलोचनाम्।
तां दृष्ट्वा हनुमान् सीतां मृगशाबनिभेक्षणाम्॥28||

मृग कन्यामिव त्रस्तां वीक्षमाणां समंततः।
दहंतीमिव निश्श्वासैः वृक्षान् पल्लवधारिणः॥29||

संघातमिव शोकानां दुख स्योर्मि मिवोत्थितां।
तां क्षामां सुविभक्तांगीं विनाभरणशोभिनीम्॥30||

प्रहर्षमतुलं लेभे मारुतिः प्रेक्ष्य मैथिलीम्।
हर्षजानि च सोsश्रूणि तां मदिरेक्षणाम्॥31||

मुमोच हनुमां स्तत्र नमश्चक्रे च राघवं ।
नमस्कृत्वाच रामाय लक्ष्मणाय च वीर्यवान्॥32||

सीतादर्शनसंहृष्टो हनुमान् संवृतोsभवत्॥33||

इत्यार्षे श्रीमद्रामायणे आदिकाव्ये वाल्मीकीये
चतुर्विंशत् सहस्रिकायां संहितायाम्
श्रीमत्सुंदरकांडे सप्तदशस्सर्गः॥

 

|| Om tat sat ||