Sloka Text in Telugu , Kannada, Gujarati, Devanagari, English

સુંદરકાંડ.
અથ સપ્તદશસ્સર્ગઃ

તતઃ કુમુદષણ્ડાબો નિર્મલો નિર્મલં સ્વયં|
પ્રજગામ નભશ્ચન્દ્રો હંસો નીલમિવોદકમ્||1||

સાચિવ્ય મિવ કુર્વન્ સ પ્રભયા નિર્મલપ્રભઃ
ચન્દ્રમા રશ્મિભિઃ શીતૈઃ સિષેવે પવનાત્મજમ્||2||

સ દદર્શ તતસ્સીતાં પૂર્ણચન્દ્ર નિભાનનામ્|
શોકભારૈરિવ ન્યસ્તાં ભારૈર્નાવ મિવામ્ભસી||3||

દિદૃક્ષમાણો વૈદેહીં હનુમાન્ મારુતાત્મજઃ|
સ દદર્શા વિદૂરસ્થા રાક્ષસી ર્ઘોરદર્શનાઃ||4||

એકાક્ષીં એકકર્ણાં ચ કર્ણ પ્રવરણાં તથા|
અકર્ણાં શંકુકર્ણાં ચ મસ્તકોછ્છ્વાસનાશિકામ્||5||

અતિકાયોત્તમાઙ્ગીમ્ ચ તનુદીર્ઘશિરોધરાં|
ધ્વસ્થકેશીં તથાઽકેશીમ્ કેશકમ્બળધારિણીમ્||6||

લમ્બકર્ણલલાટં ચ લમ્બોદરપયોધરામ્|
લમ્બોષ્ટીં ચુબુકોષ્ટીં ચ લમ્બસ્યાં લમ્બજાનુકામ્||7||

હ્રસ્વાં દીર્ઘાં તથા કુબ્જાં વિકટાં વામનાં તથા|
કરાળાં ભુગ્નવક્ત્રાં ચ પિઙ્ગાક્ષીં વિકૃતાનનામ્||8||

વિકૃતાઃ પિઙ્ગળાઃ કાળીઃ ક્રોધનાઃ કલહપ્રિયાઃ|
કાલાયસ મહાશૂલ કૂટમુદ્ગર ધારિણીઃ||9||

વરાહ મૃગ શાર્દૂલ મહિષાજ શિવામુખીઃ|
ગજોષ્ટ્ર હયપાદીશ્ચ નિખાતશિરસો પરાઃ||10||

એકહસ્તૈકપાદાશ્ચ ખરકર્ણ્યશ્વકર્ણિકાઃ|
ગોકર્ણી હસ્તિકર્ણીચ હરિકર્ણી સ્તથાપરા||11||

અનાસા અતિનાસાશ્ચ તિર્યજ્ઞ્નાસ વિનાસિકાઃ|
ગજસન્નિભનાસાશ્ચ લલાટોચ્છ્વાસનાસિકાઃ||12||

હસ્તિપાદા મહપાદા ગોપાદાઃ પાદચૂળિકાઃ|
અતિમાત્ર શિરોગ્રીવા અતિમાત્રકુચોદરી||13||

અતિમાત્રાસ્યનેત્રાશ્ચ દીર્ઘજિહ્વા નખાસ્તથા|
અજામુખીઃ હસ્તિમુખીઃ ગોમુખીઃ સૂકરીમુખીઃ||14||

હયોષ્ટ્ર ખરવક્ત્રાશ્ચ રાક્ષસીર્ઘોરદર્શનાઃ|
શૂલમુદ્ગર હસ્તાશ્ચ ક્રોધનાઃ કલહપ્રિયાઃ||15||

કરાળા ધૂમ્રકેશીશ્ચ રાક્ષસીર્વિકૃતાનનાઃ|
પિબન્તીસ્સતતં પાનં સદા માંસ સુરા પ્રિયાઃ||16||

માંસ શોણિતદિગ્ધાઙ્ગીઃ માંસશોણિતભોજનાઃ|
તા દદર્શ કપિશ્રેષ્ઠો રોમહર્ષણદર્શનાઃ||17||

સ્કન્ધવન્ત મુપાસીનાઃ પરિવાર્ય વનસ્પતિમ્|
તસ્યાધસ્તાચ્ચ તાં દેવીં રાજપુત્રીં અનિન્દિતામ્||18||

લક્ષયામાસ લક્ષ્મીવાન્ હનુમાન્ જનકાત્મજામ્|
નિષ્પ્રભાં શોકસન્તપ્તાં મલસંકુલમૂર્ધજામ્||19||

ક્ષીણપુણ્યાં ચ્યુતાં ભૂમૌ તારાં નિપતિતામિવ|
ચારિત્ર વ્યપદેશાઢ્યાં ભર્તૃદર્શનદુર્ગતામ્||20||

ભૂષણૈરુત્તમાર્હીનાં ભર્તૃવાત્સલ્યભૂષણામ્
રાક્ષસાધિપસંરુદ્ધાં બન્ધુભિશ્ચ વિનાકૃતામ્||21||

વિયૂધાં સિંહસંરુદ્ધાં બદ્ધાં ગજવધૂમિવ|
ચન્દ્રરેખાં પયોદાન્તે શારદભ્રૈરિવાવૃતામ્||22||

ક્લિષ્ટરૂપાં અસંસ્પર્શા દયુક્તા મિવ પલ્લકીમ્|
સીતાં ભર્તૃવશે યુક્તાં અયુક્તાં રાક્ષસી વશે||23||

અશોકકવનિકા મધ્યે શોકસાગરમાપ્લુતામ્|
તાભિઃ પરિવૃતાં તત્ર સગ્રહ મિવ રોહિણીમ્||24||

દદર્શ હનુમાન્ દેવીં લતા મકુસુમામિવ|
સા મલેન દિગ્ધાઙ્ગી વપુષા ચાપ્યલઙ્કૃતા||25||

મૃણાળી પઙ્કદિગ્ધેન વિભાતિ ન વિભાતિ ચ|
મલિનેનતુ વસ્ત્રેણ પરિક્લિષ્ટેન ભામિનીમ્||26||

સંવૃતાં મૃગ શાબાક્ષીં દદર્શ હનુમાન્ કપિઃ|
તાં દેવીં દીનવદનાં અદીનાં ભર્તૃતેજસા||27||

રક્ષિતાં સ્વેન શીલેન સીતાં અસિતલોચનામ્|
તાં દૃષ્ટ્વા હનુમાન્ સીતાં મૃગશાબનિભેક્ષણામ્||28||

મૃગ કન્યામિવ ત્રસ્તાં વીક્ષમાણાં સમન્તતઃ|
દહંતીમિવ નિશ્શ્વાસૈઃ વૃક્ષાન્ પલ્લવધારિણઃ||29||

સંઘાતમિવ શોકાનાં દુખ સ્યોર્મિ મિવોત્થિતાં|
તાં ક્ષમાં સુવિભક્તાઙ્ગીં વિનાભરણશોભિનીમ્||30||

પ્રહર્ષમતુલં લેભે મારુતિઃ પ્રેક્ષ્ય મૈથિલીમ્|
હર્ષજાનિ ચ સોઽશ્રૂણિ તાં દૃષ્ટ્વામદિરેક્ષણામ્|
મુમુચે હનુમાંસ્તત્ર નમશ્ચક્રે ચ રાઘવં ||31||

નમસ્કૃત્વાચ રામાય લક્ષ્મણાય ચ વીર્યવાન્|
સીતાદર્શનસંહૃષ્ટો હનુમાન્ સંવૃતોઽભવત્||32||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુંદરકાંડે સપ્તદશસ્સર્ગઃ||

||om tat sat||.