हरिः ओम्

Sloka Text in Telugu , Kannada, Gujarati, Devanagari, English

ಸುಂದರಕಾಂಡ.
ಅಥ ದ್ವಾವಿಂಶಸ್ಸರ್ಗಃ

ಸೀತಾಯಾವಚನಂ ಶ್ರುತ್ವಾ ಪರುಷಂ ರಾಕ್ಷಸಾಧಿಪಃ|
ಪ್ರತ್ಯುವಾಚ ತತಃ ಸೀತಾಂ ವಿಪ್ರಿಯಂ ಪ್ರಿಯದರ್ಶನಾಮ್|| 1||

ಯಥಾ ಯಥಾ ಸಾನ್ತ್ವಯಿತಾ ವಶ್ಯಃ ಸ್ತ್ರೀಣಾಂ ತಥಾ ತಥಾ|
ಯಥಾ ಯಥಾ ಪ್ರಿಯಂ ವಕ್ತಾ ಪರಿಭೂತ ಸ್ತಥಾ ತಥಾ||2||

ಸನ್ನಿಯಮೇಚ್ಛತಿ ಮೇ ಕ್ರೋಥಂ ತ್ವಯಿ ಕಾಮಃ ಸಮುತ್ಥಿತಃ|
ದ್ರವತಽಮಾರ್ಗ ಮಾಸಾದ್ಯ ಹಯಾ ನಿವ ಸುಸಾರಥಿಃ||3||

ವಾಮಃ ಕಾಮೋ ಮನುಷ್ಯಾಣಾಂ ಯಸ್ಮಿನ್ ಕಿಲ ನಿಬಧ್ಯತೇ|
ಜನೇ ತಸ್ಮಿನ್ ಸ್ತ್ವನುಕ್ರೋಶ ಸ್ನೇಹಶ್ಚ ಕಿಲ ಜಾಯತೇ ||4||

ಏತಸ್ಮಾತ್ ಕಾರಾಣಾನ್ ನ ತ್ವಾಂ ಘಾತಯಾಮಿ ವರಾನನೇ|
ವಧಾರ್ಹಾಂ ಅವಮಾನಾರ್ಹಾಂ ಮಿಥ್ಯಾ ಪ್ರವ್ರಜಿತೇ ರತಾಮ್||5||

ಪರುಷಾಣೀಹ ವಾಕ್ಯಾನಿ ಯಾನಿ ಯಾನಿ ಬ್ರವೀಷಿ ಮಾಮ್|
ತೇಷು ತೇಷು ವಧೋಯುಕ್ತಃ ತವ ಮೈಥಿಲಿ ದಾರುಣಃ||6||

ಏವಮುಕ್ತ್ವಾತು ವೈದೇಹೀಂ ರಾವಣೋ ರಾಕ್ಷಸಾಧಿಪಃ|
ಕ್ರೋಧಸಂರಮ್ಭ ಸಂಯುಕ್ತಃ ಸೀತಾಂ ಉತ್ತರಮಬ್ರವೀತ್||7||

ದ್ವೌಮಾಸೌ ರಕ್ಷಿತವ್ಯೌ ಮೇ ಯೋಽವಧಿಸ್ತೇ ಮಯಾ ಕೃತಃ|
ತತ ಶ್ಶಯನಮಾರೋಹ ಮಮತ್ವಂ ವರವರ್ಣಿನೀ ||8||

ಊರ್ಧ್ವಂ ದ್ವಾಭ್ಯಾಂ ತು ಮಾಸಾಭ್ಯಾಂ ಭರ್ತಾರಂ ಮಾ ಮನಿಚ್ಛತೀಮ್|
ಮಮ ತ್ವಾಂ ಪ್ರಾತರಾಶಾರ್ಥಂ ಆಲಭನ್ತೇ ಮಹಾನಸೇ||9||

ತಾಂ ತರ್ಜ್ಯಮಾನಾಂ ಸಂಪ್ರೇಕ್ಷ್ಯ ರಾಕ್ಷಸೇನ್ದ್ರೇಣ ಜಾನಕೀಂ|
ದೇವಗನ್ಧರ್ವಕನ್ಯಾಃ ವಿಷೇದುರ್ವಿಕೃತೇಕ್ಷಣಾಃ||10||

ಓಷ್ಠಪ್ರಕಾರೈಃ ಅಪರಾ ವಕ್ತ್ರನೇತ್ರೈ ಸ್ತಥಾಽಪರೇ |
ಸೀತಾಂ ಆಶ್ವಾಸಯಾಮಾಸುಸ್ತರ್ಜಿತಾಂ ತೇನ ರಕ್ಷಸಾ||11||

ತಾಭಿರಾಶ್ವಾಸಿತಾ ಸೀತಾ ರಾವಣಮ್ ರಾಕ್ಷಸಾಧಿಪಮ್|
ಉವಾಚಾತ್ಮಹಿತಂ ವಾಕ್ಯಂ ವೃತ್ತ ಶೌಣ್ಡೀರ್ಯ ಗರ್ವಿತಮ್|| 12||

ನೂನಂ ನತೇ ಜನಃ ಕಶ್ಚಿತ್ ಅಸ್ತಿ ನಿಶ್ಶ್ರೇಯಸೇ ಸ್ಥಿತಃ|
ನಿವಾರಯತಿ ಯೋ ನ ತ್ವಾಮ್ ಕರ್ಮಣೋಽಸ್ಮಾತ್ ವಿಗರ್ಹಿತಾತ್||13||

ಮಾಂ ಹಿ ಧರ್ಮಾತ್ಮನಃ ಪತ್ನೀಂ ಶಚೀಮಿವ ಶಚೀಪತೇಃ|
ತ್ವದನ್ಯಃ ತ್ರಿಷು ಲೋಕೇಷು ಪ್ರಾರ್ಥಯೇ ನ್ಮನಸಾಽಪಿ ಕಃ||14||

ರಾಕ್ಷಸಾಧಮ ರಾಮಸ್ಯ ಭಾರ್ಯಾಂ ಅಮಿತ ತೇಜಸಃ|
ಉಕ್ತವಾನಪಿ ಯತ್ಪಾಪಂ ಕ್ವ ಗತ ಸ್ತಸ್ಯ ಮೋಕ್ಷ್ಯಸೇ||15||

ಯಥಾ ದೃಪ್ತಶ್ಚ ಮಾತಙ್ಗಃ ಶಶ ಶ್ಚ ಸಹಿತೋ ವನೇ|
ತಥಾ ದ್ವಿರದವದ್ರಾಮಸ್ತ್ವಂ ನೀಚ ಶಶವತ್ ಸ್ಮೃತಃ||16||

ಸ ತ್ವಂ ಇಕ್ಷ್ವಾಕುನಾಥಂ ವೈ ಕ್ಷಿಪನ್ನಿಹನ ಲಜ್ಜಸೇ|
ಚಕ್ಷುಷೋರ್ವಿಷಯಂ ತಸ್ಯ ನ ತಾವ ದುಪಗಚ್ಛಸಿ||17||

ಇಮೇ ತೇ ನಯನೇ ಕ್ರೂರೇ ವಿರೂಪೇ ಕೃಷ್ಣಪಿಙ್ಗಳೇ |
ಕ್ಷಿತೌ ನ ಪತಿತೇ ಕಸ್ಮಾನ್ಮಾಮನಾರ್ಯ ನಿರೀಕ್ಷಿತಃ||18||

ತಸ್ಯ ಧರ್ಮಾತ್ಮನಃ ಪತ್ನೀಂ ಸ್ನುಷಾಂ ದಶರಥಸ್ಯ ಚ|
ಕಥಂ ವ್ಯಾಹರತೋ ಮಾಂ ತೇನ ಜಿಹ್ವಾ ವ್ಯವಸೀರ್ಯತೇ||19||

ಅಸಂದೇಶಾತ್ತು ರಾಮಸ್ಯ ತಪಸಶ್ಚಾನುಪಾಲನಾತ್|
ನ ತ್ವಾಂ ಕುರ್ಮಿ ದಶಗ್ರೀವ ಭಸ್ಮ ಭಸ್ಮಾರ್ಹ ತೇಜಸಾ||20||

ನಾಪಹರ್ತು ಮಹಂ ಶಕ್ಯಾ ತ್ವಯಾ ರಾಮಸ್ಯ ಧೀಮತಃ|
ವಿಧಿಸ್ತವ ವಧಾರ್ಧಾಯ ವಿಹಿತೋ ನಾತ್ರ ಸಂಶಯಃ||21||

ಶೂರೇಣ ಧನದಭ್ರಾತ್ರಾ ಬಲೈ ಸ್ಸಮುದಿತೇನ ಚ|
ಅಪೋಹ್ಯಾ ರಾಮಂ ಕಸ್ಮಾದ್ಧಿ ದಾರಚೌರ್ಯಂ ತ್ವಯಾ ಕೃತಮ್||22||

ಸೀತಾಯಾ ವಚನಂ ಶ್ರುತ್ವಾ ರಾವಣೋ ರಾಕ್ಷಸಾಧಿಪಃ|
ವಿವೃತ್ಯ ನಯನೇ ಕ್ರೂರೇ ಜಾನಕೀ ಮನ್ವವೈಕ್ಷತ||23||

ನೀಲಜೀಮೂತ ಸಂಕಾಶೋ ಮಹಾಭುಜಶಿರೋಧರಃ|
ಸಿಂಹಸತ್ವಗತಿಃ ಶ್ರೀಮಾನ್ ದೀಪ್ತಜಿಹ್ವಾಗ್ರಲೋಚನಃ||24||

ಚಲಾಗ್ರಮಕುಟಪ್ರಾಂಶುಃ ಚಿತ್ರಮಾಲ್ಯಾನುಲೇಪನಃ|
ರಕ್ತಮಾಲ್ಯಾಮ್ಬರಧರಃ ತಪ್ತಾಂಗದ ವಿಭೂಷಣಃ||25||

ಶ್ರೋಣಿ ಸೂತ್ರೇಣ ಮಹತಾ ಮೇಚಕೇನ ಸುಸಂವೃತಃ|
ಅಮೃತೋತ್ಪಾದನದ್ದೇನ ಭುಜಗೇನೈವ ಮನ್ದರಃ||26||

ತಾಭ್ಯಾಂ ಪರಿಪೂರ್ಣಾಭ್ಯಾಂ ಭುಜಾಭ್ಯಾಂ ರಾಕ್ಷಸೇಶ್ವರಃ|
ಶುಶುಭೇಽಚಲಸಂಕಾಶಃ ಶೃಙ್ಗಾಭ್ಯಾಮಿವ ಮಂದರಃ||27||

ತರುಣಾದಿತ್ಯವರ್ಣಾಭ್ಯಾಂ ಕುಣ್ಡಲಾಭ್ಯಾಂ ವಿಭೂಷಿತಃ|
ರಕ್ತಪಲ್ಲವಪುಷ್ಪಾಭ್ಯಾಂ ಅಶೋಕಾಭ್ಯಾಂ ಇವಾಚಲಃ||28||

ಸಕಲ್ಪವೃಕ್ಷಪ್ರತಿಮೋ ವಸಂತ ಇವ ಮೂರ್ತಿಮಾನ್|
ಶ್ಮಶಾನಚೈತ್ಯಪ್ರತಿಮೋ ಭೂಷಿತಽಪಿ ಭಯಂಕರಃ||29||

ಅವೇಕ್ಷಮಾಣೋ ವೈದೇಹೀಂ ಕೋಪಸಂರಕ್ತ ಲೋಚನಃ|
ಉವಾಚ ರಾವಣಃ ಸೀತಾಂ ಭುಜಙ್ಗ ಇವ ನಿಶ್ಶ್ವಸನ್||30||

ಅನಯೇನಾಭಿಸಂಪನ್ನಮ್ ಅರ್ಥಹೀನಂ ಅನುವ್ರತೇ|
ನಾಶಯಾ ಮ್ಯಹಮದ್ಯ ತ್ವಾಂ ಸೂರ್ಯಃ ಸನ್ಧ್ಯಾ ಮಿವೌಜಸಾ||31||

ಇತ್ಯುಕ್ತ್ವಾ ಮೈಥಿಲೀಂ ರಾಜ ರಾವಣಃ ಶತ್ರು ರಾವಣಃ|
ಸಂದಿದೇಶ ತತಃ ಸರ್ವಾ ರಾಕ್ಷಸೀರ್ಘೋರದರ್ಶನಾಃ||32||

ಏಕಾಕ್ಷೀಂ ಏಕಕರ್ಣಾಂ ಚ ಕರ್ಣಪ್ರಾವರಣಂ ತಥಾ|
ಗೋಕರ್ಣೀಂ ಹಸ್ತಿಕರ್ಣೀಂ ಚ ಲಮ್ಬಕರ್ಣೀಂ ಅಕರ್ಣಿಕಾಮ್||33||

ಹಸ್ತಿ ಪಾದ್ಯಶ್ವಪಾದ್ಯೌ ಚ ಗೋಪಾದೀಂ ಪಾದಚೂಳಿಕಮ್|
ಏಕಾಕ್ಷೀಂ ಏಕಪಾದೀಂ ಚ ಪೃಥುಪಾದೀಂ ಅಪಾದಿಕಾಮ್||34||

ಅತಿಮಾತ್ರ ಶಿರೋ ಗ್ರೀವಾಂ ಅತಿಮಾತ್ರ ಕುಚೋದರೀಮ್|
ಅತಿಮಾತ್ರಸ್ಯ ನೇತ್ರಾಂ ಚ ದೀರ್ಘಜಿಹ್ವಾಂ ಅಜಿಹ್ವಿಕಾಮ್||35||

ಅನಾಶಿಕಾಂ ಸಿಂಹಮುಖೀಂ ಗೋಮುಖೀಂ ಸೂಕರೀಮುಖೀಮ್|
ಯಥಾ ಮದ್ವಶಗಾ ಸೀತಾ ಕ್ಷಿಪ್ರಂ ಭವತಿ ಜಾನಕೀ||36||

ತಥಾ ಕುರುತ ರಾಕ್ಷಸ್ಯಃ ಸರ್ವಾಂ ಕ್ಷಿಪ್ರಂ ಸಮೇತ್ಯ ಚ|
ಪ್ರತಿಲೋಮಾನು ಲೋಮೈಶ್ಚ ಸಾಮದಾನಾದಿ ಭೇದನೈಃ||37||

ಅವರ್ಜಯತ ವೈದೇಹೀಂ ದಣ್ಡಸ್ಯೋದ್ಯಮನೇನಚ|
ಇತಿ ಪ್ರತಿಸಮಾದಿಶ್ಯ ರಾಕ್ಷಸೇನ್ದ್ರಃ ಪುನಃ ಪುನಃ||38||

ಕಾಮಮನ್ಯುಪರೀತಾತ್ಮಾ ಜಾನಕೀಂ ಪರ್ಯತರ್ಜಯತ್|
ಉಪಗಮ್ಯ ತತಃ ಕ್ಷಿಪ್ರಂ ರಾಕ್ಷಸೀ ಧಾನ್ಯಮಾಲಿನೀ||39||

ಪರಿಷ್ವಜ್ಯ ದಶಗ್ರೀವಂ ಇದಂ ವಚನಮಬ್ರವೀತ್|
ಮಯಾಕ್ರೀಡ ಮಹಾರಾಜ ಸೀತಯಾ ಕಿಂ ತವಾನಯಾ||40||

ವಿವರ್ಣಯಾ ಕೃಪಣಯಾ ಮಾನುಷ್ಯಾ ರಾಕ್ಷಸೇಶ್ವರ|
ನೂನಂ ಅಸ್ಯಾ ಮಹಾರಾಜ ನ ದಿವ್ಯಾನ್ ಭೋಗಸತ್ತಮಾನ್||41||

ವಿದದಧಾತ್ಯಮರಶ್ರೇಷ್ಠಃ ತವ ಬಾಹುಬಲಾರ್ಜಿತಾನ್|
ಅಕಾಮಂ ಕಾಮಯಾನಸ್ಯ ಶರೀರಮುಪತಪ್ಯತೇ||42||

ಇಚ್ಛನ್ತೀಂ ಕಾಮಯಾನಸ್ಯ ಪ್ರೀತಿರ್ಭವತಿ ಶೋಭನಾ|
ಏವಮುಕ್ತಸ್ತು ರಾಕ್ಷಸ್ಯಾ ಸಮುತ್‍ಕ್ಷಿಪ್ತ ಸ್ತತೋ ಬಲೀ||43||

ಪ್ರಹಸನ್ಮೇಘ ಸಙ್ಕಾಶೋ ರಾಕ್ಷಸಃ ಸ ನ್ಯವರ್ತತ|
ಪ್ರಸ್ಥಿತಃ ಸ ದಶಗ್ರೀವಃ ಕಂಪಯನ್ನಿವ ಮೇದಿನೀಮ್||44||

ಜ್ವಲದ್ಭಾಸ್ಕರವರ್ಣಾಭಾಂ ಪ್ರವಿವೇಶ ನಿವೇಶನಮ್|
ದೇವಗನ್ಧರ್ವ ಕನ್ಯಾಶ್ಚ ನಾಗಕನ್ಯಾಶ್ಚ ಸರ್ವತಃ|
ಪರಿವಾರ್ಯ ದಶಗ್ರೀವಂ ವಿವಿಶು ಸ್ತಂ ಗೃಹೋತ್ತಮಮ್ ||45||

ಸ ಮೈಥಿಲೀಂ ಧರ್ಮಪರಾಂ ಅವಸ್ಥಿತಾಮ್
ಪ್ರವೇಪಮಾನಾಂ ಪರಿಭರ್ತ್ಸ್ಯ ರಾವಣಃ|
ವಿಹಾಯಸೀತಾಂ ಮದನೇನ ಮೋಹಿತಃ
ಸ್ವಮೇವ ವೇಶ್ಮ ಪ್ರವಿವೇಶ ಭಾಸ್ವರಮ್||46||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ದ್ವಾವಿಂಶಸ್ಸರ್ಗಃ||

|| ಓಮ್ ತತ್ ಸತ್||