||Sundarakanda ||

|| Sarga 26||( Only Slokas in Devanagari) )

हरिः ओम्

सुंदरकांड.
अथ षड्विंशस्सर्गः

प्रसक्ताश्रुमुखी त्येवं ब्रुवंती जनकात्मजा।
अधोमुखमुखी बाला विलप्तुमुपचक्रमे॥1||

उन्मत्तेव प्रमत्तेव भ्रांतचित्तेव शोचती।
उपावृता किशोरीव विवेष्ठंती महीतले॥2||

राघवस्य प्रमत्तस्य रक्षसा कामरूपिणा।
रावणेन प्रमध्याsह मानीता क्रोशती बलात्॥3||

राक्षसी वशमापन्ना भर्त्स्यमाना सुदारुणम्।
चिंतयंती सुदुःखार्ता नाहं जीवितु मुत्सहे॥4||

नहि मे जीवितैरर्थो नैवार्थैर्न च भूषणैः।
वसंत्या राक्षसी मध्ये विना रामं महारथम्॥ 5||

अश्मसार मिदं नूनं मथवा प्यजरामरम्।
हृदयं मम येनेदं न दुःखे नावशीर्यते॥6||

धिज्ञ्मामनार्य मसतीं या हं तेन विनाकृता।
मुहूर्तमपि रक्षामि जीवितं पाप जीविता॥7||

का च मे जीविता श्रद्धा सुखेवा तं प्रियं विना।
भर्तारं सागरांतायाः वसुधायाः प्रियं वदम्॥8||

भिद्यतां भक्ष्यतां वापि शरीरं विशृजाम्यहम्।
न चाप्यहं चिरं दुःखं सहेयं प्रियवर्जिता॥9||

चरणे नापसव्येन न स्पृशेयं निशाचरम्।
रावणं किं पुनरहं कामयेयं विगर्हितम्॥10||

प्रत्याख्यातं न जानाति नात्मानं नात्मनः कुलम्।
यो नृशंस स्वभावेन मां प्रार्थयितुमिच्छति॥11||

छिन्ना भिन्ना विभक्ता वा दीप्ते वाग्नौ प्रदीपिता।
रावणं नोपतिष्ठेयं किं प्रलापेन न श्चिरम्॥12||

ख्यातः प्राज्ञः कृतज्ञश्च सानुक्रोशश्च राघवः।
सद्वृत्तो निरनुक्रोशः शंके मद्भाग्य संक्षयात्॥13||

राक्षसानां सहस्राणि जनस्थाने चतुर्दशः।
येनै केन निरस्तानि स मां किं नाभिपद्यते॥14||

निरुद्धा रावणे नाहं अल्पवीर्येण रक्षसा।
समर्थः खलु मे भर्ता रावणं हंतुमाहवे॥15||

विराधो दंडकारण्ये येन राक्षस पुंगवः।
रणे रामेण निहतः स मां किं नाभिपद्यते॥16||

कामं मध्ये समुद्रस्य लंकेयं दुष्प्रधर्षणा।
न तु राघव बाणानां गतिरोधी ह विद्यते॥17||

किन्नु तत्कारणं येन रामो धृढ पराक्रमः।
रक्षसापहृतां भार्या मिष्टां नाभ्यवपद्यते॥18||

इहस्थां मां न जानीते शंके लक्ष्मण पूर्वजः।
जानन्नपि हि तेजस्वी धर्षणं मर्षयिष्यति॥19||

हृतेति योsधिगत्वा मां राघवाय निवेदयेत् ।
गृधराजोsपि स रणे रावणेन निपातितः॥20||

कृतं कर्म महत्तेन मां तथाsभ्यवपद्यता।
तिष्ठता रावणद्वंद्वे वृद्धेनापि जटायुषा॥21||

यदि मा मिह जानीयात् वर्तमानं स राघवः।
अद्य बाणै रभिक्रुद्धः कुर्याल्लोकमराक्षसम्॥22||

विधमेच्छ पुरीं लंकां शोषयेच्छ महोदधिम्।
रावणस्य च नीचस्य कीर्तिं नाम च नाशयेत्॥23||

ततो निहता नाधानां राक्षसीनां गृहे गृहे।
यथा हमेवं रुदती तदा भूयो नसंशयः॥24||

अन्विष्य रक्षसां लंकां कुर्याद्रामः सलक्ष्मणः।
न हि ताभ्यां रिपुर्दृष्टो मुहूर्तमपि जीवति॥25||

चिताधूमाकुलपथा गृधमंडल संकुला ।
अचिरेण तु लंकेयं श्मशान सदृशीभवेत्॥26||

अचिरेणैव कालेन प्राप्स्याम्येव मनोरथम्।
दुष्प्रस्थानोsय माख्याति सर्वेषां वो विपर्ययम्॥27||

यादृशा नीह दृश्यंते लंकाया मशुभानि वै।
अचिरेण तु कालेन भविष्यति हतप्रभा॥28||

नूनं लंका हते पापे रावणे राक्षसाधमे।
शोषं यास्यति दुर्धर्षा प्रमदा विधवा यथा॥29||

पुण्योत्सवसमुत्था च नष्टभर्त्री स राक्षसी।
भविष्यति पुरी लंका नष्टभर्त्री यथांगना॥30||

नूनं राक्षसकन्यानां रुदंतीनां गृहे गृहे।
श्रोष्यामि न चिरादेव दुःखार्ताना मिह ध्वनिम्॥31||

सांधकारा हतद्योता हत राक्षसपुंगवा।
भविष्यति पुरी लंका निर्दग्धा रामसायकैः॥32||

यदि नाम स शूरो मां रामो रक्तांतलोचनः।
जानीयद्वर्तमानां हि रावणस्य निवेशने॥33||

अनेन तु नृशंसेन रावणे नाधमेनमे।
समयो यस्तु निर्दिष्टः तस्यकालोsयमागतः॥34||

अकार्यं ये न जानंति नैरृतां पापकारिणः।
अधर्मात्तु महोत्पातो भविष्यति हि सांप्रतम् ॥35||

नैते धर्मं विजानंति राक्षसाः पिशिताशनाः।
ध्रुवं मा प्रातराशार्थे राक्षसः कल्पयिष्यति॥36||

साsहं कथम् करिष्यामि तं विना प्रियदर्शनम्।
रामं रक्तांतनयनं अपस्यंती सुदुःखिता॥37||

यदि कश्चित्प्रदातामे विषस्याद्य भवेदिह।
क्षिप्रं वैवस्वतं देवं पश्येयं पतिना विना॥38||

ना जाना ज्जीवतीं रामः स मां लक्ष्मणपूर्वजः।
जानंतौ तौ न कुर्यातां नोर्व्यां हि मम मार्गणम्॥39||

नूनं ममैव शोकेन स वीरो लक्ष्मणाग्रजः।
देवलोक मितोयातः त्यक्त्वा देहं महीपते॥40||

धन्या देवाः सगंधर्वाः सिद्धाश्चपरमर्षयः।
मम पश्यंति ये नाथं रामं राजीव लोचनम्॥41||

अथवा किन्नु तस्यार्थो धर्मकामस्य धीमतः।
मया रामस्य राजर्षेर्भार्यया परमात्मनः॥42||

दृश्यमाने भवेत्प्रीतिः सौहृदं नास्त्यपश्यतः।
नाशयंति कृतघ्नास्तु न रामो नाशयिष्यति॥43||

किं नु मे नगुणाः केचित् किंवा भाग्यक्षयो मम।
याsहं सीदामि रामेण हीना मुख्येन भामिनी॥44||

श्रेयो मे जीवितान् मर्तुं विहीनया महात्मनः।
रामादक्लिष्ट चारित्रात् शूरात् शत्रुनिबर्हणात्॥45||

अथवा न्यस्तशस्त्रौ तौ वने मूलफलाशिनौ।
भ्रातरौ हि नरश्रेष्टौ संवृतौ वनगोचरौ॥46||

अथवा राक्षसेंद्रेण रावणेन दुरात्मना।
छद्मना घातितौ शूरौ भ्रातरौ रामलक्ष्मणौ॥47||

साsहमेवं गते काले मर्तु मिच्छामि सर्वथा।
न च मे विहितो मृत्यु रस्मिन् दुःखेsपि वर्तति॥48||

धन्याः खलु महात्मानो मुनयः त्यक्त किल्बिषाः।
जितात्मानो महाभागा येषां न स्तः प्रियाप्रिये॥49||

प्रियान्न संभवेत् दुःखं अप्रियादधिकं भयं।
ताभ्यां हि ये नियुज्यंते नमस्तेषां महात्मनाम्॥50||

साsहं त्यक्ता प्रियार्हेण रामेण विदितात्मना ।
प्राणां स्त्यक्ष्यामि पापस्य रावणस्य गता वशम्॥51||

इत्यार्षे श्रीमद्रामायणे आदिकाव्ये वाल्मीकीये
चतुर्विंशत् सहस्रिकायां संहितायाम्
श्रीमत्सुंदरकांडे षड्विंशस्सर्गः॥

 

|| Om tat sat ||