||Sundarakanda ||

|| Sarga 7||( Only Slokas in Devanagari) )

हरिः ओम्

सुंदरकांड.
अथ सप्तमस्सर्गः

स वेश्मजालं बलवान् ददर्श
व्यासक्त वैढूर्यसुवर्णजालम्।
यथामहत्प्रावृषि मेघजालम्
विदुत्पिनद्धं सविहंगजालम्॥1||

निवेशनानां विविधाश्चशालाः
प्रधानशंखायुधचापशालाः।
मनोहराश्चापिपुनर्विशालाः
ददर्श वेश्माद्रिषु चंद्रशालाः॥2||

गृहाणि नानावसुराजितानि
देवासुररैश्चापि सुपूजितानि।
सर्वैश्च दोषैः परिवर्जितानि
कपिर्ददर्श स्वबलार्जितानि॥3||

तानि प्रयत्नाभिसमाहितानि
मयेव साक्षादिव निर्मितानि।
महीतले सर्व गुणोत्तराणी
ददर्श लंकाधिपतेर्गृहाणि॥4||

ततो ददर्शोच्छ्रितमेघरूपम्
मनोहरं कांचनचारुरूपम्।
रक्षोsधिप स्यात्मबलानुरूपम्
गृहोत्तमं ह्यप्रतिरूपरूपम्॥5||

महीतले स्वर्गमिव प्रकीर्णम्
श्रियाज्वलंतं बहुरत्न कीर्णम्।
नानातरूणां कुसुमावकीर्णम्
गिरेरिवाग्रं रजसावकीर्णम्॥6||

नारीप्रवेकैरिव दीप्यमानम्
तटिद्भि रंभोदव दर्च्यमानम्।
हंसप्रवेकैरिव वाह्यमानम्
श्रियायुतं के सुकृतं विमानम्॥7||

यथा नगाग्रं बहुधातुचित्रम्
यथा नभश्च ग्रहचंद्रचित्रम्।
ददर्शयुक्तीकृत मेघचित्रम्
विमानरत्नं बहुरत्न चित्रम्॥8||

महीकृता पर्वतराजिपूर्णा
शैलाः कृता वृक्षवितानपूर्णा।
वृक्षाः कृता पुष्पवितानपूर्णाः
पुष्पं कृतं केसर पत्र पूर्णम्॥9||

कृतानि वेश्मानिच पांडुराणि
तथासुपुष्पाणपि पुष्कराणि।
पुनश्च पद्मानि स केसराणि
धन्यानि चित्राणि तथा वनानि॥10||

पुष्पाह्वयं नाम विराजमानं
रत्नप्रभाभिश्च विवर्थ मानम्।
वेश्मोत्तमाना मपि चोच्चमानम्
महाकपिस्तत्र महाविमानम्॥11||

कृताश्च वैढूर्यमया विहंगाः
रूप्यप्रवाळैश्च तथा विहंगाः।
चित्राश्च नानावसुभि र्भुजंगाः
जत्यानुरूपास्तुरगा श्शुभांगाः॥12||

प्रवाळजांबूनदपुष्पपक्षाः
सलील मावर्जितजिह्मपक्षाः।
कामस्य साक्षादिव भांति पक्षाः
कृताविहंगा स्सुमुखास्सुपक्षाः॥13||

नियुज्यमानास्तु गजास्सुहस्ताः
स केसराश्चोत्पलपत्त्रहस्ताः।
बभूव देवी च कृता सुहस्ता
लक्ष्मीस्तथा पद्मिनि पद्महस्ता॥14||

इतीव तद्गृहमभिगम्य शोभनम्
सविश्मयो नगमिव चारु शोभनम्।
पुनश्च तत्परमसुगंधि सुंदरम्
हिमात्यये नगमिव चारुकंदरम्॥15||

ततस्स् तां कपि रभिपत्य पूजितां
चरन् पुरीं दशमुखबाहुपालिताम् ।
अदृश्यतां जनकसुतां सुपूजिताम्
सुदुःखितः पतिगुणवेगवर्जिताम्॥16||

ततस्तदा बहुविधभावितात्मनः
कृतात्मनो जनकसुतां सुवर्त्मनः।
अपश्यतोsभव दतिदुःखितं मनः
सुचक्षुषः प्रविचरतो महात्मनः॥17||

इत्यार्षे श्रीमद्रामायणे आदिकाव्ये वाल्मीकीये
चतुर्विंशत् सहस्रिकायां संहितायाम्
श्रीमत्सुंदरकांडे सप्तमस्सर्गः॥


 

 

 

 





 



 

|| Om tat sat ||