రామాయణంలో
బాలకాండ !
( బాలకాండ విశిష్ఠత)
బాలకాండ గురించి విననివారు తెలియనివారు వుండరు . కాని బాలకాండ మహాత్మ్యము ఎక్కువగా తెలియకపోవడం అసహజము కాదు !
బాలకాండలో ముఖ్యమైన ఘట్టాలు చాలావున్నాయి.
ప్రథమ సర్గలో మొట్టమొదటి సంభాషణలో వాల్మీకి నారదుని అడిగిన ప్రశ్న " కోనశ్మిన్ సాంప్రతం లోకే.. " అంటే ఈ ముల్లోకాలలో అత్యంత శ్రేష్ఠుడైన నరుడు ఎవడు అని . దానికి సమాధానంగా నారదుడు " రామో నామ జనైః శ్రుతః " అంటూ రాముని కథ వివరిస్తాడు. ప్రథమసర్గలో వంద శ్లోకాలలో మనం పూర్తి రామాయణ కథ సంక్షిప్తముగా వింటాము. అందుకని బాలకాండలో ప్రథమసర్గ సంక్షిప్త రామాయణముగా ప్రబల పడింది ! ప్రథమ సర్గ పారాయణ చాలా కుటుంబాలలో ఆనవాయితీ . మా అమ్మ చాలాకాలం రామాయణ పారాయణ అంటే ప్రథమ సర్గ పారాయణ చేసేది.
బాలకాండలో రెండవసర్గలో బ్రహ్మ ప్రత్యక్షం అవుతాడు . అంటే ప్రథమ సర్గలో దేవ ఋషి వస్తే రెండవసర్గలో దేవుడే ప్రత్యక్షంగా వస్తాడన్నమాట.
ఎందుకు ?
అది క్రౌంచపక్షుల జంటలో ఒక పక్షి నిషాదునిచేతిలో వధింపబడడం , ఆ కారణముగా జనించిన కారుణ్యముతో ఇంకా శోకముతో "మా నిషాద ప్రతిష్ఠాం త్వం .." అంటూ చెప్పిన శ్లోకము గురించి మథన పడుతున్న వాల్మీకి మహాముని మనస్సు కుదుట పరచి, "రామస్య చరితం సర్వం కురు ఋషిసత్తమ" అని ఆదేశింఛి , రామాయణ రచనకి కావలసిన అనుభూతి ఇవ్వడం కోసము.
" మా నిషాద ప్రతిష్ఠాం త్వం .." ఆని వాల్మీకి నోటినుండి వెలువడిన శ్లోకమే మొదటి సంస్కృత శ్లోకముగా ప్రసిద్ధి పొందింది. సంస్కృతంఉ చదివిన ప్రతి విద్యార్థికి అది కంఠస్థమే
అప్పటి బ్రహ్మవాక్కు-
యావత్ స్థాస్యంతి గిరయః సరితశ్చ మహీతలే|
తావద్రామాయణ కథా లోకేషు ప్రచరిష్యతి ||
"ఈ భూమిలో పర్వతాలూ నదులూ ఉన్నంతకాలము రామాయణ కథ కీర్తింపబడుతుంది "అని
బాలకాండలో శ్రీరాముని జననం శ్రీరాముని బాల్యావస్థలో జరిగిన ఘట్టాలు , విశ్వామిత్రుని ద్వారా సగరుడు , గంగావతరణం, సాగర మంథనము , అహల్యా విమోచనము తో కలిపి అనేక కథలు వస్తాయి. ఈ కథలలోనే భారతసంస్కృతి కి మూలపాదైన క్షమా గుణము గురించి వాల్మీకి ద్వారా ఒక శ్లోకము వస్తుంది.
క్షమా దానం క్షమా యజ్ఞః క్షమా సత్యం హి పుత్రికా |
క్షమా యశః క్షమా ధర్మః క్షమయా నిష్ఠితం జగత్ ||
అలాగే శతానందుని ద్వారా విశ్వామిత్రుడు వశిష్టునితో సమానంగా బ్రహ్మర్షి అయిన కథ , జనకుని ద్వారా సీత జన్మవృత్తాంతము - "క్షేత్రం శోధయతా లబ్ధా నామ్నా సీతేతి విశ్రుతా" - శ్రీరాముడు శివుని విల్లు భంగం చెయ్యడము , జానకీ పాణిగ్రహణము అన్నీ కూడా బాలకాండలో వస్తాయి.
ఆప్పుడు సీతాకల్యాణ ఘట్టములో జనకుడు చెప్పిన మాట ,
ఇయం సీతా మమ సుతా సహధర్మచారీతవ|
ప్రతీచ్ఛ చైనాం భద్రంతే పాణిం గృహ్ణీష్వ పాణినా ||
ఆ శ్లోకము ఇప్పటికీ చాలా ఇళ్ళలో వివాహ ఆహ్వాన పత్రికలో కనపడు తోనే ఉంటుంది !
బాలకాండ అంతిమ ఘట్టాలలో సీతారామ కల్యాణముతో పాటు లక్ష్మణ భరత శతృఘ్నుల కల్యాణము కూడా అవుతుంది.
చిట్ట చివరి ఘట్టము పరశురామావతార సమాప్తము - పరశురాముడు శ్రీరామునితో
అక్షయం మధు హంతారం
జానామి త్వం సురేశ్వరం
శ్రీరాముడే విష్ణు స్వరూపమని అని గ్రహించి అంటాడు.
అదే రామావతారానికి నాంది !
చాలా కుటుంబాలలో సుందరాకాండ వారి ఆత్మ వారి అత్మీయుల సుఖశాంతుల కోసము చదువుతారు. కాని పిల్లల పురోగతి కోసము అందరూ బాలకాండ పారాయణ చేస్తారు !
అదే బాలాకాండ విశిష్ఠత !!
!! ఓమ్ తత్ సత్ !!
-
ఇంకో మాట !!
వాల్మీకి రామాయణములో
బాలకాండ
- ముందుమాట
రామాయణానికి దాంట్లో మొదటి కాండకి ఉపోద్ఘాతము అనవసరము అని ఎవరికైన అనిపిస్తుంది. కాని సంస్కృత భాషలో ఒక ఆనవాయితీ వుంది . అది ఏమిటీ అంటే దానికి సమాధానము ఇది. ఏది మొదలు పెట్టినా అది ఏమిటి , అది ఎవరికోసరము , దాని ప్రయోజనమేమిటి అని చిన్న ప్రశ్నలకు మొట్టమొదలు లో విశదీకరించాలి. అది ఒక ఆనవాయితీ. అది మొదటి శ్లోకములోనో మొదటి అధ్యాయములోనో క్లుప్తముగా చెపుతారు.
అదే ముందు మాట.
అది అంటే బాలకాండ ఏమిటీ అన్నది కొంచెము పెద్దదిగా వేరేగా విశదీకరించాలి . అది ఎవరికోసరము దాని ప్రయోజనమేమిటీ అన్నవి చాలాక్లుప్తముగా చెప్పవచ్చు. అందువలన ముందు మాటలో ఎవరికోసరము దాని ప్రయోజనమేమిటీ అన్న విషయాలు చెపుదాము.
ఇది ఎవరికోసరము కాదు మా
సంతోషానికే అని చెప్పవచ్చు .
మాకు ఒక మనవరాలు వస్తోంది అని విన్నప్పుడు - అ చిన్నారి కి స్వాగతము పలుకుతూ రామాయణములోని బాలకాండను రాద్దాము అని ఒక ఆలోచనపుట్టింది . అది వెంటనే అమలులో పెట్టాము. ఆ ఆలోచన ప్రభావమే ఈ బాలకాండ.
ఇంక దాని ప్రయోజనమేమిటీ అంటే ముఖ్యముగా స్వప్రయోజనమే.
మనస్సు అన్నది ఒక అదుపులోలేని గుఱ్ఱము. అది అమిత వేగముతో అన్ని చోట్లకి వెళ్ళిపోతో వుంటుంది. ఏప్పూడూ లాస్ ఆల్టోస్ , ఫిలడెల్ఫియా . న్యూయార్కు , వాషింగ్టన్ , దేశదేశాలూ క్షణంలో వెళ్ళి వస్తోవుంటుంది. దాన్ని కళ్ళేము కట్టి
వుంచడము అన్నది సామాన్య మానవులకు కాని పని . దాని కోసము మన పూర్వీకులు తపస్సు అనే కార్యక్రమములో మునిగి పోయేవారు. దానితో వాళ్ళకి వాళ్ల మనస్సు అధీనములో వుండేది. అయితే అందరూ తపస్వీకులుకాగలరా ? తపస్సు అంటే అన్నీ విడిచిపెట్టి దూరముగా మడి కట్టుకోని , ఒక కాలిమీద నుంచుని ధ్యానము చేయ్యాలి అంటే, అది అందరికీ కాని పని.
అందుకే భగవద్గీతలో భగవంతుడు తపస్సు అన్న మాటకి చిన్న అనువైన అర్థము చెప్పాడు.
కర్మ ఆచరించడమే తపస్సు అని.
కర్మ అంటే నిష్కామకర్మ అని .
తన తృప్తి కోసము చేసే కర్మ నిష్కామకర్మ అవుతుందా అన్న ప్రశ్న వదిలేద్దాము.
కాని ఈ పని కోసము అంటే బాలకాండ రాద్దామని కూర్చున్నప్పుడు మాత్రము ఇంక ఏ విధమైన అలోచనలేకుండా అది అతి వేగముతో అయిపోయేది. ఆ కొంచెము సేపూ మనస్సు అధీనములో వుండేది. అదే నా ముఖ్యప్రయోజనము. అది సఫలము అయింది.
ఇంకో ప్రయోజనము - అది తరతరాలు గా వస్తున్నమాట. అది బాలకాండ చదివితే పిల్లలకి మంచిదీ అన్నమాట. ఆ విషయము తరతరాలుగా వస్తున్న మాట . అది అందరికీ చెల్లిన మాట. ఇది రాసి అందరికీ అందచేస్తే మంచిదే కదా !.
నేను తిరుపతి కొండ ఎక్కుతూ వుంటే చాలామంది ' చూడు ఆ ముసలాయన ఎలాఎక్కుతున్నాడో అనకోవడము' , కొంతమంది ఆగి ఆ ఎక్కడము గురించి స్పందించడము , అలాగే ఒక పెద్ద వయస్సులో ఒక ఆయన డిగ్రీ తీసుకోవడము చూచి తనకు కూడా చదవాలనిపిస్తోంది అనుకోడము , ఇలాంటివి విని ఒకరకమైన సంతోషం వస్తుంది . ఆ సంతోషము మనము చేసినపనికన్నా , ఆ పని ఇంకోళ్ళకి వాళ్ల బాటలో వాళ్లకి వాళ్ళే ఇంకో అడుగు తీసుకోడానికి అనువైంది కదా అని .
అలాగే బాలకాండ రాద్దామనుకోవడము , ఆ అలోచనను సఫలము చేయడము చూచి - చిన్నవాళ్ళకి పట్టుదలవుంటే అనుకున్నపని సాధించగలమనే ధైర్యము ఇంకొంచెము పటిష్టమైతే అదే వాళ్ళ మనస్తాపాలకి , వాళ్ళ సుఖానుభూతికి , వాళ్ళ మనో అభ్యున్నతికి దారి చూపిస్తుంది. అది ఇంకో పెద్ద ప్రయోజనము.
అదే మాముందు మాట.
ఇది కాసరబాద వారి పుష్పము.
!! ఓమ్ తత్ సత్ !!
info@kasarabada.org
1 విజయనామ సంవత్సర శుభాకాంక్షలు
2 స్థితప్రజ్ఞుని గురించి - భగవద్గీతలో
3 అన్నదానం గురించి - అమ్మ మాట
6 - సేమ్యాపరమాన్నము -
సెప్టెంబరు 1st !!
7 శాంతి మంత్రాలు -
కార్యసిద్ధి మంత్రాలు !!
8 యజ్ఞము- తపస్సు - ధ్యానము
click here to go to Telugu Home page !!
