||ఓమ్ తత్ సత్||

వివేక చూడామణి  శ్లోకములు 206-207

జలం పంకవద్ అత్యంతమ్ 

పంకాపాయే జలస్ఫుటం|

యథా భాతి తథాత్మాపి

దోష అభావే  స్ఫుటప్రభః|| 206||

అసన్నివృత్తౌతు సదాత్మనః స్ఫుటమ్

ప్రతీతిరేతస్య భవేత్ ప్రతీచః|

తతో నిరాసః కరణీయ ఏవ

సదాత్మనః సాధ్వహమాది వస్తునః|| 207||

శ్లోకము 206

జలం పంకవద్ అత్యంతమ్ 

చాలా పంకము ( మాలిన్యము) తో కూడిన జలము, 

పంకాపాయే జలస్ఫుటం 

పంకము( మాలిన్యము)  తీయబడగానే జలము స్పష్టముగా ప్రకాశించును.

యథా భాతి - ఎలా ప్రకాశించునో

తథాత్మాపి - అలాగే ఆత్మకూడా

దోష అభావే  స్ఫుటప్రభః

దోషము లేకున్నప్పుడు స్పష్టముగా ప్రకాశించును.

అంటే  శ్లోకము యొక్క తాత్పర్యము - 

- అత్యంత మాలిన్యము తో కూడిన జలము మాలిన్యము తీయబడగానే, జలము స్పష్టముగా  ఎలా ప్రకాశించునో - అలాగే ఆత్మకూడా దోషము లేకున్నప్పుడు స్పష్టముగా ప్రకాశించును.

ఈ తాత్పర్యముతో మనకి తెలిసేది -  ఆత్మలో అహంకారము లాంటి అన్ని దోషాలు వదిలేయాలి , అప్పుడే ఆత్మ ప్రకాశించును. అదే మాట ముందు శ్లోకములో చెపుతాడు గురువు.

శ్లోకము 207

అసన్నివృత్తౌతు సదాత్మనా స్ఫుటమ్

ప్రతీతిరేతస్య భవేత్ ప్రతీచః|

తతో నిరాసః కరణీయ ఏవ

సదాత్మనః సాధ్వహమాది వస్తునః|| 207||

అసన్నివృత్తౌతు - 

అసత్తులన్నీ నివర్తించిన పిమ్మట

సదాత్మనః స్ఫుటమ్ ప్రతీతిః 

పరమాత్మయొక్క స్ఫుటమైన స్వరూపము (జ్ఞానము)

భవేత్ ప్రతీచః -  ప్రకాశించును

అంటే అసత్తులు , అదే అనాత్మకి సంభంధించిన  వస్తువులు విడతీస్తే, అంటే వదిలేస్తే, పరమాత్మ యొక్క స్ఫుటమైన స్వరూపము ప్రకాశించును.

అయితే మనము చేయవలసినది ఏమిటి?

తతో నిరాసః కరణీయ ఏవా

అందువలన వదలివేయడము చేయవలసినదే

ఏవి వదిలేయాలి?

సదాత్మనః సాధు అహమాది వస్తునః|

ఆత్మ భావమునుండి అనిత్యమగు అహం అనబడే వస్తువులను

అంటే, ఇక్కడ తాత్పర్యము -  అసత్తులన్నీ నివర్తించిన పిమ్మట పరమాత్మయొక్క స్ఫుటమైన స్వరూపము (జ్ఞానము) ప్రకాశించును కనుక ,   ఆత్మ భావమునుండి అనిత్యమగు అహం అనబడే వస్తువులను వదలి వేయవలసినదే.

రెండు శ్లోకాలు కలిపితే,

అతంత మాలిన్యము తో కూడిన జలము, మాలిన్యము తీయబడగానే,  స్పష్టముగా  ఎలా ప్రకాశించునో - అలాగే ఆత్మకూడా దోషము లేకున్నప్పుడు స్పష్టముగా ప్రకాశించును. అందువలన మనము ఆత్మలో దూరే అనాత్మవస్తువులను  వదిలి వేయవలెను అని. 

అనాత్మ ఎప్పుడు అంతమౌతుందో అప్పుడు మనకి ఆత్మ స్వరూపము స్పష్టముగా కనిపించును.

అందుకని , అనాత్మ వస్తువులను ఇవి కాదు కాదు అనుకుంటూ వదలివేయవలెను.

ఇదంతా విజ్ఞానకోశము లో వచ్చిన మాటలు. మరి, విజ్ఞానకోశము అత్మా స్థానమా అన్నమాటకి, సమాధానము ముందు శ్లోకములో వింటాము

___________________________________________________

 

||ఓమ్ తత్ సత్||