!! సుందరకాండ !!
అఱువది ఎనిమిదవ సర్గము

అథాహముత్తరం దేవ్యా పునరుక్తస్సంభ్రమః |
తవస్నేహాన్నర వ్యాఘ్ర సౌహార్దాదనుమాన్యవై ||

తా|| ఓ నరేంద్రా నీకు నాపై మిక్కిలి ప్రేమాదరములు సౌహార్దము ఉండుటవలన ఆ దేవియూ నాతో సాదరముగా మఱల ఇట్లు పలికెను !

ఏవం బహువిథో వాచ్యో రామో దాశరథిస్త్వయా |
యథా మామాప్నుయాచ్ఛీఘ్రం హత్వా రావణ మాహవే ||
యది వా మన్యసే వీర వసైకాహమరిందమ|
కస్మింశ్చిత్ సంవృతే దేశే విశ్రాంతశ్వో గమిష్యసి ||

తా|| " దశరథుని కుమారుడైన శ్రీరాముడు యుద్ధమున హతమార్చి శీఘ్రముగా నన్ను గొనిపోవునట్లు ఆయనతో బహువిధములుగా చెప్పుము . ఓ మహావీరా ! శత్రువులను పరిమార్చువాడా నీకు సమ్మతమైనచో ఒక దినము ఉండుము. ఒక రహస్యమైన ప్రదేశములో విశ్రాంతి తీసుకొని వెళ్ళవచ్చును.

అయం చ వీర సందేహః తిష్ఠతీవ మమాగ్రతః |
సుమహాంస్త్వత్సహాయేషు హర్యృక్షేషు హరీశ్వరః ||
కథం ను ఖలు దుష్పారం తరిష్యంతి మహో దధిమ్ |
తాని హర్యృక్షుసైన్యాని తౌ వా నరవరాత్మజౌ ||
తదస్మిన్ కార్యనిర్యోగే వీరైవం దురతిక్రమే |
కిం పశ్యసి సమాధానం బ్రూహి కార్యవిదాం వర ||

తా|| "ఓ వీరుడా నీ సహాయకులైన భల్లూక వానరులుపై నాకు ఒక సందేహమున్నది. దాటశక్యముగాని ఆ మహోదధిని వానర భల్లూక సైన్యములతో అ రాజకుమారులిద్దరూ ఎట్లు దాటగలరు. కార్యసాధకులలో శ్రేష్ఠుడైన ఓ మహావీరా ! అందువలన అతిక్రమించశక్యముగాని ఆ మహోదధిని దాటుటకు ఏ ఉపాయము ఆలోచించుచుంటివి ? "

కామమస్య త్వమేవైకః కార్యస్య పరిసాధనే |
పర్యాప్తః పరవీరఘ్నః యశస్యస్తే బలోదయః ||
బలైసమగ్రైః యది మాం హత్వా రావణమాహవే |
విజయీ స్వాం పురీం రామో నయేత్ తత్ స్యాద్యశస్కరమ్ ||
యథాహం తస్య వీరస్య వనాదుపథినా హృతా |
రక్షసా తద్భయాదేవ తథా నార్హతి రాఘవః ||
బలైస్తు సంకులాం కృత్వా లంకాం పరబలార్దవః |
మాం నయేద్యది కాకుత్ స్థః తత్ తస్య సదృశం భవేత్ ||

తా|| ఓ మారుతీ ఈ కార్యము సాధించుటకు సర్వసమర్థుడవైన నీవొక్కడివే చాలును . కాని నీ బలప్రదర్శన వలన నీ కీర్తి పెరుగునే కాని శ్రీరామునకు గాని నాకుగాని కలగవు. శ్రీరాముడు సమస్త బలములతో రణరంగమున రావణుని హతమార్చి నన్ను స్వపురమునకు తీసుకుపోయినచో అది యే ఆ ప్రభువుకును నాకును శ్రేయస్కరము. శ్రీరామునకు భయపడి ఆ రాక్షసుడు నన్ను వంచనతో అపహిరించెను. అటులనే ఇప్పుడు నన్ను తీసుకొనిపోవుట శ్రీరామునికి తగదు. శత్రుబలములను రూపుమాపగల శ్రీరాముడు తన బలములతో లంకను కల్లోల పఱిచి నన్ను స్వయముగా తీసుకొని పోవుటయే అ మహావీరునకు తగును .

తదర్థోపహితం వాక్యం ప్రశ్రితం హేతుసంహితమ్ |
నిశమ్యాహం తతస్సేషం వాక్యముత్తరమబ్రవీత్ ||

తా|| అర్థముగూడిఅ హేతుబద్ధమైన వినయముతో గూడిన ఆమె మాటలను విని నే ఈవిధముగా ప్రత్యుత్తరమిచ్చితిని.

దేవీ హర్యృక్షసైన్యానాం ఈశ్వరః ప్లవతాం వరః |
సుగ్రీవః సత్యసంపన్నః తవార్థే కృతనిశ్చయః ||
అసకృతైర్మహభాగైః వానరైర్బలగర్వితైః |
ప్రదక్షిణీకృతాభూమిః వాయుమార్గానుసారిభిః ||
మద్విశిష్థాశ్చ తుల్యాశ్చ సంతి తత్ర వనౌకసః |
మత్తః ప్రత్యవరః కశ్చిత్ నాస్తి సుగ్రీవ సన్నిధౌ ||
అహం తావదిహ ప్రాప్తః కిం పునస్తే మహాబలాః |
న హి ప్రకృష్టాః ప్రేష్యంతే ప్రేష్యంతే హీతరే జనాః ||

తా||| ఓ దేవీ వానరభల్లూకసైన్యములకు ప్రభువు కపిశ్రేష్ఠుడు మహాబలశాలి అగు సుగ్రీవుడు నిన్ను శ్రీరాముని కడకు చేర్చుటకై దృఢముగా నిశ్చయించుకొని యున్నాడు. సుగ్రీవుని సన్నిధిలో వున్న వానరులు నాతో సమానులు లేక నాకంటెనూ గొప్పవారేకాని నాకన్న తక్కువ వారు లేరు. నేనే ఇచటికి రాగలిగినప్పుడు ఆ మహాబలశాలుర విషయము చెప్పనేల. సాధారణముగా యజమానులు ఏ కార్యమునకైననూ చిన్నవారినే పంపుదురు. పెద్దవారిని పంపరుగదా !

తదలం పరితాపేన దేవీ మన్యుర్వ్యపైతు తే |
ఏకోత్పాతేన తే లంకామ్ ఏష్యంతి హరియూథపాః ||

తా|| ఓ దేవీ ఇక నీవు పరితపింపవలదు. విచారమును వీడుము. ఆ వానరులందరూ ఒక గంతులో వచ్చి లంకలో వాలగలరు.

మమపృష్ఠగతౌ తౌచ చంద్రసూర్యావివోదితౌ |
త్వత్సకాశం మహాభాగే నృశింహావాగమిష్యతః ||
అరిఘ్నం సింహసంకాశం క్షిప్రం ద్రక్ష్యసి రాఘవమ్ |
లక్ష్మణం చ ధనుష్పాణీం లంకాద్వారముపస్థితమ్ ||

తా|| పవిత్రమైన మనస్సుగల ఓ దేవీ ఉదయించుచున్న సూర్య చంద్రు లవలె తేజోమూర్తులూ నరేంద్రులు అయిన ఆ రామలక్ష్మణులను నా భుజములపై ఎకి ఇచటికి రాగలరు. శత్రుసూదనుడు సింహపరాక్రముడు అయిన శ్రీరాముని, ధనుష్పాణి అయిన లక్ష్మణుని త్వరలో లంకా ద్వారము కడ నీవు దర్శింపగలవు>

నఖదంష్ట్రాయుధాన్ వీరాన్ సింహశార్దూలవిక్రమాన్ |
వానరాన్ వారనేంద్రాభాన్ క్షిప్రమ్ ద్రక్ష్యసి సంగతాన్ ||
శైలాంబుద నికాసానామ్ లంకామలయసానుషు |
వర్ధతామ్ కపిముఖ్యానామ్ అచిరాచ్ఛ్రోష్యసి స్వనమ్ ||

తా|| నఖములు దంతములు ఆయుధములుగా గలవారు, సింహము పులులవలె పరాక్రమము గలవారును మాహావీరులు , గజేంద్రునివలే బలశాలురైన వానరులను త్వరలోనే ఇచట చూడగలవు. పర్వతమువలె , మేఘములవలె ఉన్నతులు లంకా పర్వతసానువులయందు గర్జించుచుండు వారును అగు వానరులయొక్క ధ్వనులను నీవు శీఘ్రముగనే వినగలవు.

నివృత్తవనవాసం చ త్వయా సార్థమరిందమమ్ |
అభిషిక్తమయోధ్యాయాం క్షిప్రం ద్రక్ష్యసి రాఘవమ్ ||

తా|| శత్రుమర్దనుడైన శ్రీరాముడు వనవాసము ముగిసిన పిమ్మట నీతో గూడి అయోధ్యలో పట్టాభిషిక్తుడగుటను నీవు త్వరలోనే చూడగలవు.

తతో మయా వాగ్భిరదీన భాషిణా
శివాభిరిష్ఠాభిరభిప్రసాదితా |
జగామ శాంతిం మమ మైథిలాత్మజా
తవాతిశోకేన తథాతిపీడితా ||

తా|| నీ ఎడబాటువలన శోకముచేతనూ , రాక్షసుల పీడించుటవలన పరితాపమునకు లోనైన సీతాదేవికి ధైర్యముగూర్చితిని అప్పుడు ఆ తల్లి నా సమక్షముననే మనశ్శాంతిని పొందినది

!! ఇత్యార్షే శ్రీమద్రామాయణే
వాల్మీకియే ఆదికావ్యే
సుందరకాండే అష్ఠషష్ఠితమసర్గః
సమాప్తం !!

!! వాల్మీకిచే రచించబడిన ఆదికావ్యమైన
రామాయణమునందలి
సుందరకాండము
అఱువది ఎనిమిదవ సర్గము
సమాప్తము !!

Om Tat Sat