॥ఓమ్ తత్ సత్॥

వివేక చూడామణి 280-281 శ్లోకములు:

స్వ అధ్యాస అపనయం కురు - అంటే నీకు ధ్యాస లేకపోవడాన్ని , అంటే చంచలత్వాన్ని తొలగించు అంటూ ఈ రెండు శ్లోకాలలో  చంచలత్వాన్ని తొలగించడము గురించిఇంకా చెపుతున్నాడు గురువు

శ్లోకము 280:

ప్రారబ్ధం పుష్యతి వపుః
ఇతి నిశ్చిత్య నిశ్చలః।
ధైర్యమాలమ్బ్య యత్నేన
స్వాధ్యాసాపనయం కురు॥ 280॥

1 ప్రారబ్ధం పుష్యతి వపుః-
ప్రారబ్ధకర్మయే శరీరమును నడిపించును;

2 ఇతి నిశ్చిత్య నిశ్చలః -
అని నిశ్చయించుకొని నిశ్చలమైన మనస్సు కలవాడై;

శరీరమును ప్రారబ్ధకర్మ నడిపించును అని నిశ్చలమనస్సు కలవాడై , అంటే శారీరక అవసరాలమీద భయము లేనివాడై ముందుకు పోవలెను అని. భవద్గీతలో కూడా ఇదేమాట ఇంకో రూపములో చెపుతాడు కృష్ణుడు.
 
మాత్రాస్పర్శాస్తు కౌన్తేయ శీతోష్ణ సుఖదుఃఖదాః ।
ఆగమాపాయినోఽనిత్యాం తామ్ తితీక్షస్వ భారత॥
శరీరానికి కలిగే సుఖ దుఃఖాలు అనిత్యాలు - వాటిని భరించు అని   

3 ధైర్యమాలమ్బ్య యత్నేన -
ధైర్యము వహించి ప్రయత్నముతో;

4 స్వాధ్యాసాపనయం కురు
నీ భ్రమలను నశింప చేయుము;

శారీరికవసరాలమీద భయము లేని వాడై ధైర్యముతో , భ్రమలను నశింపచేయు కార్యక్రమములో వెళ్ళుము అని గురువు చెపుతున్నమాట.

280 శ్లోక తాత్పర్యము:

ప్రారబ్ధకర్మయే శరీరమును నడిపించును అని నిశ్చయించుకొని నిశ్చలమైన మనస్సు కలవాడై; ధైర్యము వహించి ప్రయత్నముతో నీ భ్రమలను నశింప చేయుము;

శ్లోకము 281:

నాహం జీవః పరంబ్రహ్మేతత్
తద్ వ్యావృత్తిపూర్వకమ్।
వాసనా వేగతః ప్రాప్తః
స్వాధ్యాసాపనయం కురు॥ 281॥

1 నాహం జీవః పరంబ్రహ్మేతత్ -
నేను జీవుడను కాను పరబ్రహ్మమును అని;

2 తద్ వ్యావృత్తిపూర్వకమ్।
అ వృత్తిపూర్వకమైన వానిని నిరాకరిస్తూ;

నేని జీవుడను కాను. ఆ పరబ్రహ్మము నేనే అనే ధ్యాసతో, బ్రహ్మముకన్నా వేరైన బుద్ధి మనస్సు ప్రాణ శరీరములను నిరాకరిస్తూ అని. 

3 వాసనా వేగతః ప్రాప్తః -
పూర్వజన్మ వాసనల వలన ప్రాప్తించిన

4 స్వాధ్యాసాపనయం కురు -
నీ భ్రమలను నశింప చేయుము;

పూర్వజన్మ వాసనలవలన ప్రాప్తించిన భ్రమలను, నేనే ఆ పరబ్రహ్మముమను అని నిరాకరించి ఆ భ్రమలను నశింప చేయవలెను అని భావము

281 శ్లోక తాత్పర్యము:

నేను జీవుడను కాను పరబ్రహ్మమును అని, అ వృత్తిపూర్వకమైన  అంటే బ్రహ్మముకన్నా వేరైన బుద్ధి మనస్సు ప్రాణ శరీరములను నిరాకరిస్తూ, పూర్వజన్మ వాసనల వలన ప్రాప్తించిన నీ భ్రమలను నశింప చేయుము; అని.

॥ఓమ్ తత్ సత్॥

___________________________________________-