॥ఓమ్ తత్ సత్॥

వివేక చూడామణి 308-310 శ్లోకములు:

గురువు  ఇంకా అహంకారము వదలాలి అన్నమాట మీద మళ్ళీ మళ్ళీ  చెపుతాడు ఈ మూడు శ్లోకాలలో.

శ్లోకము 308

తస్మాత్ అహంకారం ఇమం స్వశత్రుం
భోక్తుర్గళే కటవత్ ప్రతీతమ్।
విచ్ఛిద్య విజ్ఞాన మహాసినా స్ఫుటమ్
భుఙ్క్షాత్వ సామ్రాజ్య సుఖం యథేష్ఠం॥308॥

1 తస్మాత్ అహంకారం ఇమం స్వశత్రుం -
  అందువలన అహంకారమనబడే ఈ నీ శత్రువుని

2 భోక్తుర్గళే కటవత్ ప్రతీతమ్। -
   కంఠములో గుచ్చుకున్న ముల్లువలె భావించబడుచున్న

అందువలన కంఠములో గుచ్చుకున్న ముల్లువలె భావించబడుచున్న అహంకారమనబడే ఈ నీ శత్రువుని తీసిపారేసేయ్.

3 విచ్ఛిద్య విజ్ఞాన మహాసినా స్ఫుటమ్
   విజ్ఞానమనబడెడి తీక్ష్ణ మైన  కత్తితో నాశనము చేసి

4 భుఙ్క్ష్వాత్మ సామ్రాజ్య సుఖం యథేష్ఠం
 ఆత్మ సామ్రాజ్య సుఖం యథేష్ఠం భుంక్ష్వ  -
 ఆత్మ సామ్రాజ్య సుఖమును అడ్డులేకుండా అనుభవింపుము:

అహంకారమనేబడే ముల్లుని తీసేస్తే నిరంతర అఖండ ఆనందమును యథేచ్ఛగా అనుభవించుము అని గురు ఉపదేశము.

308 శ్లోక తాత్పర్యము:

"అందువలన కంఠములో గుచ్చుకున్న ముల్లువలె భావించబడుచున్న అహంకారమనబడే ఈ నీ శత్రువుని తీసిపారేసి, ఆత్మ సామ్రాజ్య సుఖము అంటే నిరంతర అఖండ ఆనందమును అడ్డులేకుండా అనుభవింపుము"

శ్లోకము 309

తతోఽహమాదేః వినివృత్య వృత్తిమ్
సంత్యక్త రాగః పరమార్థలాభాత్।
తూష్ణీం సమాస్వాత్మ సుఖానుభూత్వా
పూర్ణాత్మనా బ్రహ్మణి నిర్వికల్పః॥309॥

1 తతోఽహమాదేః వినివృత్య వృత్తిమ్ -
పిమ్మట అహంకారము మున్నగు వాటినుంచి మనస్సుని మరలించి

2 సంత్యక్త రాగః పరమార్థలాభాత్।
పరమార్థము గ్రహించి విడువబడిన రాగద్వేషములు కలవాడై 

3 తూష్ణీం సమాస్వ  ఆత్మ సుఖానుభూత్వా
ఆత్మ సుఖము అనుభవిస్తూ తూష్ణీభావము పొందుము

తూష్ణీభావము పొందుము - అంటే క్రియారహితుడవు కమ్ము అని.

4 పూర్ణాత్మనా బ్రహ్మణి నిర్వికల్పః -
పూర్ణస్వరూపముతో బ్రహ్మయందు నిర్వికల్ప రూపుడవై వుండుము

తాత్పర్యము:

"పిమ్మట అహంకారము మున్నగు వాటినుంచి మనస్సుని మరలించి, పరమార్థము గ్రహించి విడువబడిన రాగద్వేషములు కలవాడై, పూర్ణస్వరూపముతో బ్రహ్మయందు నిర్వికల్ప రూపుడవై, ఆత్మ సుఖము అనుభవిస్తూ క్రియారహితుడవు కమ్ము"

శ్లోకము 310:

స మూల కృత్తోపి  మహానహం పునః
వుల్లేఖితః స్యాత్ యది చేతసా క్షణం
సంజీవ్య విక్షేప శతం కరోతి
న భస్వతా ప్రావృషి వారిదో యథా॥310॥

1 స మూల కృత్తోపి  మహానహం పునః -
సమూలముగా ఛేధించబడిననూ ఈ మహత్తరమైన అహంకారము..

అహంకారము చాలామహత్తరమైనది. ఎందుకు ? అది ఎన్నో  కొమ్మలున్న మహావృక్షములాంటిది. ఆ వృక్షాన్ని కొట్టేశినా మళ్ళీ ఎక్కడో చిగుళ్ళూ కనిపిస్తాయి. అలాగే అహంకారము మళ్ళీ మళ్ళీ  పైకి లేస్తో ఉంటుంది

2 వుల్లేఖితః స్యాత్ యది చేతసా క్షణం-
మనస్సు చేత ఒక క్షణము చిగురింపచేయబడినచో ..

అహంకారము సమూలముగా ఛేధింపబడిననూ, మనస్సుచేత ఒక క్షణము చిగురింపచేయబడినచో , అది మళ్ళీ విజృంభిస్తుంది అని తాత్పర్యము.

3 సంజీవ్య విక్షేప శతం కరోతి -
  మరల ఉత్పన్నమై వందలకొలది చిగుళ్ళను చేయును

4 నభస్వతా ప్రావృషి వారిదో యథా-
  వర్షాకాలములో వాయువు చేత విచ్చిన్నమైన మేఘములు మళ్ళీ కూడు కొని కుండపోతు వాన కురిసినట్లు  

310 వ శ్లోకము తాత్పర్యము:

"వర్షాకాలములో వాయువు చేత విచ్చిన్నమైన మేఘములు మళ్ళీ కూడుకొని కుండపోతు వాన కురిపించినట్లు, సమూలముగా ఛేధించబడిననూ ఈ మహత్తరమైన అహంకారము, మనస్సు చేత ఒక క్షణము చిగురింప చేయబడినచో, మరల ఉత్పన్నమై వందలకొలది చిగుళ్ళను చేయును;"

________________________________________________
గురువు  ఇంకా అహంకారము వదలాలి అన్నమాట మీద మళ్ళీ మళ్ళీ  చెపుతాడు ఈ మూడు శ్లోకాలలో.

 

__________________________________________________